“দেউতাই দি যোৱা মাটিডোখৰত আমি স-সন্মানেৰে মূৰ তুলি জীয়াই থাকিব লাগিব। বৰ্তমান খিলঞ্জীয়াৰ প্ৰতি অহা চৰম ভাবুকিক আমি মষিমূৰ কৰিব লাগিব। সকলো ক্ষেত্ৰতে গাঁৱৰ খিলঞ্জীয়া জনে বহিৰাগতৰ পৰা অনাদৃত হৈ আহিছে। এই বহিৰাগতৰ দপদপনিক নসাৎ কৰিবলৈ আমি বদ্ধপৰিকৰ “।
এইয়া অৱশ্যে আমি কোৱা কথা নহ’য়। এইয়া গোলাঘাট বৰপথাৰৰ উদ্যমী যুৱক আকাশ বৰাৰ ভাষ্য। তেওঁৰ তত্বাৱধানতে গোলাঘাটত এক শক্তিশালী ৰূপত গঢ় লৈ উঠিছে “অসম সাৰথি” নামৰ এই অৰ্থনৈতিক সংস্থাটো।
২০১৯ বৰ্ষত গোলাঘাটৰ আৱৰ্ত ভৱনত আলফা (স্বাধীন)ৰ আলোচনা পন্থী নেতা জীতেন দত্তৰ নেতৃত্বত গঠিত “অসম সাৰথি” এই অৰ্থনৈতিক সংস্থাটোৱে ইতিমধ্যে বহুতো যুৱক-যুৱতীক সামৰি লৈছে। যাৰ উদ্দেশ্যে আছিল অসমৰ ভূমিত অসমীয়াৰ অধিকাৰ সাব্যস্ত কৰা।
অসমত উৎপাদিত সামগ্ৰী অসমৰ বজাৰত উপলব্ধ হওঁক। অসমৰ বজাৰ দখল কৰিবলৈ যিসকল যুৱক-যুৱতী আগবাঢ়ি আহিছে , তেওঁলোকক আৰ্থিক সাহায্য প্ৰদান কৰা। যিহেতু অৰ্থনৈতিক স্বাৱলম্বীতাহে খিলঞ্জীয়াৰ অধিকাৰ সুৰক্ষিত কৰিব। সেইয়া লাগিলে যিকোনো ক্ষেত্ৰ যেনে- কৃষিকৰ্ম, নাইবা ব্যৱসায় হ’ব পাৰে।
এই উদ্দেশ্যৰে “অসম সাৰথি”য়ে উজনিৰ পৰা নামনিলৈ বহু যুৱক-যুৱতীক ইতিমধ্যে সামৰি লৈ আৰম্ভ কৰিছে অসমীয়াৰ বজাৰ দখলৰ প্ৰচেষ্টা।
সংস্থাত অন্থৰ্ভূক্ত হোৱা এইসকল যুৱক-যুৱতীৰ পৰা সামান্য এটা মাননি ২০-৩০ টকাকৈ সংগ্ৰহ কৰি গোট খোৱা পুজিৰে বিভিন্ন কৰ্মৰে স্বাৱলম্বী হোৱাৰ সপোন দেখা সকললৈ আগবঢ়াইছে আৰ্থিক অনুদান।
কেৱল সেইয়াই নহ’য় লকডাউনৰ সময়ছোৱাত আৰ্থিক দৈনতাৰে যুঁজ দিয়া কোনো ক্ষুদ্ৰ ব্যৱসায়ী অথবা শিল্পীলৈ আগবঢ়াইছে সহায়ৰ হাত।
“অসম সাৰথি”ৰ সহায়েৰে এতিয়া বহু নিবনুৱা যুৱক-যুৱতী উপকৃত হৈ পিতৃ-মাতৃৰ মুখত হাঁহি বিৰিঙাবলৈ সক্ষম হৈছে। তেনেক্ষেত্ৰত “অসম সাৰথি” ৰ এই প্ৰয়াসক আদৰিছে সকলো খিলঞ্জীয়া অসমীয়াই।
আকাশ বৰাৰ কথাৰে, সঁচা অৰ্থত অসমৰ সম্পদ অসমীয়াৰ দখললৈ আহিলেহে অসমত অসমীয়াৰ অধিকাৰ সুনিশ্চিত হ’ব।
