এক ভয়ংকৰ আক্ৰমণত নিহত হৈছে হাইটিৰ ৰাষ্ট্ৰপতি জোভেনেল মোইছে।
এই ঘটনাত মোইছেৰ পত্নী গুৰুতৰ ভাবে আহত হৈছে।
হাইটিৰ ৰাজধানী পোৰ্ট অ’ প্ৰিন্সত থকা ৰাষ্ট্ৰপতিৰ বাসভৱনতে সংঘটিত হৈছে আক্ৰমণৰ ঘটনাটো।
হাইটিৰ অন্তৰ্ৱৰ্তীকালীন প্ৰধানমন্ত্ৰী ক্লড যোছেফে প্ৰকাশ কৰা মতে অস্ত্ৰধাৰী লোকৰ দল এটাই বলপূৰ্বক ৰাষ্ট্ৰপতিৰ বাসভৱনত প্ৰৱেশ কৰে আৰু ৰাষ্ট্ৰপতিৰ ওপৰত প্ৰাণঘাতী আক্ৰমণ সংঘটিত কৰে।
আক্ৰমণত ৰাষ্ট্ৰপতিৰ পত্নী তথা ফাৰ্ষ্ট লেডী মাৰ্টিনা মোইছে গুৰুতৰ ভাবে আহত হয়।
তেওঁক সংকটজনক অৱস্থাত চিকিৎসালয়লৈ নিয়া হৈছে।
ৰাষ্ট্ৰপতিগৰাকীক কোনে হত্যা কৰিলে সেয়া এতিয়াও স্পষ্ট হোৱা নাই।
আৰক্ষীয়ে ইতিমধ্যে তদন্ত আৰম্ভ কৰিছে যদিও কাকো গ্ৰেপ্তাৰ কৰিবলৈ সক্ষম হোৱা নাই।
এই ঘটনাৰ পিছতে পোৰ্ট অ’ প্ৰিন্স চহৰৰ বিভিন্ন ঠাইত গুলীয়াগুলীৰ ঘটনা সংঘটিত হোৱাৰ বাতৰি আহিছে।
বুধবাৰে নিশা সংঘটিত এই ঘটনাৰ পিছতে সমগ্ৰ দেশ খনতে নিৰাপত্তা ব্যৱস্থা কটকটীয়া কৰি তোলা হৈছে।
উল্লেখ্য নিহত ৰাষ্ট্ৰপতি জোভেনেল মোইছে ২০১৭ চনৰ পৰাই দেশ খনৰ ৰাষ্ট্ৰপতিৰ পদত অধিষ্ঠিত হৈ আছিল।
৫৩ বছৰীয়া মোইছেৰ বিৰুদ্ধে আছিল দুৰ্নীতিৰ বহু অভিযোগ।
দেশ খনত প্ৰায়েই মোইছেৰ বিৰুদ্ধে গণ জাগৰণৰ সৃষ্টি হৈ আহিছিল।
