বড়োভূমিত নতুনকৈ জন্মলাভ কৰা বিদ্ৰোহী সংগঠন নেছনেল লিবাৰেছন ফ্ৰণ্ট অব বডোলেণ্ড চমুকৈ NLFB ৰ নেতা এম বাথাকলৈ ৰাজ্য চৰকাৰৰ মূৰ কামোৰণিৰ সৃষ্টি হৈ থকাৰ সময়তে আজি দুৰ্ধৰ্ষ নেতা জনে আত্মসমৰ্পন কৰে।
ওদালগুৰিৰ ভাৰত-ভূটান সীমান্তত বাথাই লগত আন কেইবাজনো সতীৰ্থৰ সৈতে অসম আৰক্ষীৰ ওচৰত আত্মসমৰ্পণ কৰে।
NLFB ৰ নেতা এম বাথাক সম্প্ৰতি লালপানী আৰক্ষী থানালৈ নিয়া হৈছে। জানিব পৰা মতে তেওঁক শীঘ্ৰে গুৱাহাটীলৈ অনাৰ ব্যৱস্থা কৰা হ’ব।
বিদ্ৰোহী সংগঠনটোৰ নেতা এম বাথাই আজি অসম আৰক্ষীৰ ওচৰত আত্মসমৰ্পন কৰাৰ পূৰ্ণ সম্ভাৱনা থকাৰ কথা নৰ্থ ইষ্ট নাওত পূৰ্বেই প্ৰকাশ কৰা হৈছিল।
বিনোদ মুছাহাৰী ওৰফে এম বাথাই অৰুণাচলত আন বহু সতীৰ্থৰ সৈতে আত্মগোপন কৰি আছিল।
বাথা আৰু NLFB ৰ আন সদস্যসকলক আনিবলৈ অসম আৰক্ষীৰ বিশেষ শাখাৰ এটা দল অৰুণাচললৈ যোৱা বুলি এটা সূত্ৰই জানিবলৈ দিছিল।
উল্লেখ্য ২০২০ চনৰ জানুৱাৰী মাহত তৃতীয় বড়ো শান্তি চুক্তি স্বাক্ষৰৰ জৰিয়তে NDFB -এ অস্ত্ৰ পৰিহাৰ কৰাৰ পিছতে সেই সময়ৰ NDFB ৰ দুৰ্ধৰ্ষ নেতা বাথায়ো আত্মসমৰ্পন কৰিছিল।
কিন্তু পিছত তেওঁ পুনৰ অৰণ্যলৈ উভতি গৈছিল আৰু চলিত বৰ্ষৰ মাৰ্চ মাহত NLFB নামৰ নতুন বিদ্ৰোহী সংগঠনটোৰ জন্ম দিছিল।
বড়োভূমিক পুনৰ ৰক্তাক্ত কৰাৰ যড়যন্ত্ৰত লিপ্ত হোৱা NLFB ৰ নেতা বাথাক ৰাষ্ট্ৰীয় তদন্তকাৰী সংস্থা নিয়াই মষ্ট ৱাণ্টেড ঘোষণা কৰাৰ লগতে তেওঁৰ মূৰৰ মূল্য ১০ লাখ টকা নিৰ্ধাৰণ কৰি দিছিল।
বাথাই আজি আত্মসমৰ্পন কৰাটো হ’ব বড়োভূমিৰ বাবে এক আশাৰ বতৰা।বিটিআৰ প্ৰধান প্ৰমোদ বড়োই আজি বাথাৰ আত্মসমৰ্পন অনুষ্ঠানত উপস্থিত থাকে। বড়োই বড়োভূমিত শান্তি অক্ষুন্ন থাকিব বুলি মন্তব্য কৰে।
