অহা ২৬ জুলাইৰ পৰা বিশ্বনাথ জিলাৰ ১৩ টাকৈ বটলিফ ফেক্টৰী অনিদিষ্ট কালৰ বাবে বন্ধ থাকিব। আজি এই কথা এক সংবাদমেল যোগে জানিবলৈ দিছে বিশ্বনাথ জিলা বটলীফ টি প্ৰডিউচাৰ সন্থাই।
উল্লেখ্য যে কালি বিশ্বনাথৰ উপায়ুক্তৰ কাৰ্যালয়ৰ সভাকক্ষত অনুষ্ঠিত হোৱা এখন সভাত ক্ষুদ্ৰ চাহ খেতিয়ক সকলক যিদৰে টী-বোৰ্ডে কেঁচাপাতৰ মূল্য নিৰ্ধাৰণ কৰিছে ঠিক অনুৰূপ ধৰণে টী-বোৰ্ডে বটলিফ ফেক্টৰী সমূহৰ উৎপাদিত চাহপাতৰ মূল্য নিৰ্ধাৰণ কৰাৰ দাবীতেই এই প্ৰতিবাদী কাৰ্যসূচী গ্ৰহণ কৰিছে।
বটলিফ ফেক্টৰী সমূহৰ ন্যায্য দাম প্ৰাপ্তিৰ অবিহনে বিশ্বনাথ জিলাৰ ১৩ টাকৈ চাহ ফেক্টৰী সোমবাৰৰ পৰা বন্ধ ৰখাৰ সিদ্ধান্তৰ কথা বটলিফ ফেক্টৰীসমূহে সংবাদমেলত জানিবলৈ দিয়ে।
তাৎপৰ্যপূৰ্ণভাৱে কালি বিশ্বনাথ জিলা উপযুক্তৰ কাৰ্যালয়ত ভাৰতী চাহ বোৰ্ডৰ বিষয়ববীয়াৰ লগতে বিশ্বনাথ জিলা ক্ষুদ্ৰ চাহ খেতিয়ক সন্থা, বিহালী আঞ্চলিক ক্ষুদ্ৰ চাহ খেতিয়ক সন্থাৰ সভাপতি সম্পাদকৰ উপস্থিতিত এখন ত্রিপাক্ষিক বৈঠক অনুষ্ঠিত হৈছিল।
উক্ত বৈঠকত ক্ষুদ্ৰ চাহ খেতিয়ক সকলৰ কেঁচা চাহপাতৰ নূন্যতম মূল্য জিলা উপাযুক্তই ২৮ টকা ৭২ পইচা নিৰ্ধাৰণ কৰিবলৈ ভাৰতীয় চাহ বোৰ্ডৰ বিষয়ববীয়াক এক নিৰ্দেশ প্ৰদান কৰাৰ লগতে এই নিৰ্দেশ পালন নকৰা ফেক্টৰীসমূহৰ অনুজ্ঞাপত্র বাতিল কৰাৰ এক কঠোৰ নিৰ্দেশনা প্ৰদান কৰিছিল।
এই নিৰ্দেশনাৰ কথা উল্লেখ কৰি আজি বিশ্বনাথ জিলা বটলিফ ফেক্টৰী সমূহৰ স্বত্বাধিকাৰ সকলে সংবাদমেল যোগে দাবী জনায় যে ক্ষুদ্ৰ চাহ খেতিয়ক সকলক যিদৰে টী বোৰ্ডে কেঁচা চাহপাতৰ মূল্য নিৰ্ধাৰণ কৰিছে, ঠিক একেদৰে টী বোৰ্ডে বটলিফ ফেক্টৰী সমূহৰ উৎপাদিত চাহৰ মূল্যও নিৰ্ধাৰণ কৰক।
বটলিফ ফেক্টৰীৰ সংশ্লিষ্ট পক্ষই আনকি ক্ষুদ্ৰ চাহ খেতিয়কৰ পৰা কলঘৰে যদি টী বোৰ্ডে বান্ধি দিয়া মূল্যত পাত ক্ৰয় কৰিবলৈ বাধ্য কৰোৱা হয় তেন্তে এই ফেক্টৰীসমূহে ক্ৰয় কৰা পাতৰে উৎপাদিত চাহৰ প্ৰতি কেজি চাহপাতত ৪০/৫০ টকা লোকচানৰ সন্মূখীন হ’ব বুলিও সাংবাদিকক অৱগত কৰে।
আনহাতে, এই বটলিফ ফেক্টৰী সমূহ নিৰ্মাণ কৰা কালত ফেক্টৰীৰ স্বত্বাধিকাৰসকলে বহু কোটি টকাৰ ধাৰৰ বোজা লৈ থৈছে।
তেনেস্থলত যদি টী বোৰ্ডে কালি নিৰ্ধাৰণ কৰি দিয়া মূল্য ক্ষুদ্ৰ চাহ খেতিয়কক প্ৰদান কৰিব লাগে, তেনেহলে বেংকৰ ধাৰ পৰিশোধ কৰা দূৰৰ কথা ফেক্টৰী বন্ধ কৰাৰ বাহিৰে হাতত কোনো ধৰণৰ বিকল্প নাথাকিব বুলিও বটলিফ ফেক্টৰী কৰ্তৃপক্ষই স্পষ্ট কৰি দিয়ে।
সেয়ে এই ক্ষেত্ৰত উচিত মীমাংসা নোহোৱা পৰ্যন্ত অহা সোমবাৰৰ পৰা বিশ্বনাথ জিলাৰ বটলিফ ফেক্টৰীসমূহে কেঁচা চাহপাত লোৱা বন্ধ ৰখাৰ সিদ্ধান্ত গ্ৰহণ কৰিছে বুলি ঘোষণা কৰে সন্থাটোৱে।
