আজি গুৱাহাটী ৰাজীৱ ভৱনত প্ৰদেশ কংগ্রেছৰ সভাপতি ভূপেন কুমাৰ বৰাৰ উপস্থিতিত এক যোগদান কাৰ্যসূচী অনুষ্ঠিত হয়।
ভাৰতীয় জাতীয় কংগ্রেছ দলৰ নীতি আৰু আদৰ্শৰ প্ৰতি আকৰ্ষিত হৈ পিপুলছ জইন্ট একশ্যন কমিটি ফৰ বডোলেণ্ড মুভমেন্ট (PJACBM) ৰ মুখ্য আহ্বায়ক গর্জন মছাহাৰী সহিতে কেইবাগৰাকী ৰাজ্যিক পৰ্যায়ৰ নেতাই ভাৰতীয় জাতীয় কংগ্ৰেছ দলত যোগদান কৰে।
আজিৰ এই যোগদান কাৰ্যসূচীত প্ৰদেশ কংগ্রেছৰ সভাপতি ভূপেন কুমাৰ বৰা, অসম কংগ্রেছ বিধায়িনী দলৰ দলপতি দেৱব্ৰত শইকীয়া, প্ৰদেশ কংগ্রেছৰ কাৰ্যকৰী সভাপতি কমলাক্ষ দে’ পুৰকায়স্থ আৰু বিধায়ক জাকিৰ হুছেইন শিকদাৰ, জ্যেষ্ঠ কংগ্রেছ নেতা শৰৎ বৰকটকী, হিৰণ্য বৰা, দ্বিজেন শৰ্মা, বলীন কুলী আদি উপস্থিত থাকে।
যোগদান কাৰ্যসূচীত উপস্থিত থাকি প্ৰদেশ কংগ্রেছৰ সভাপতি বৰাই গর্জন মছাহাৰীক ভাৰতীয় জাতীয় কংগ্রেছ দললৈ আদৰণি জনাই কয়, “ৰাজ্যখনৰ জনসাধাৰণৰ বৰ্তমানৰ বিজেপি চৰকাৰখনৰ প্ৰতি মোহভংগ হৈছে। আজিৰ পৰা BTR ত নতুন দিগন্তৰ সূচনা হ’ল। কাল অমানিশা আঁতৰি নতুন সূৰুয উদয় হৈছে। বিগত সময় খিনিত বিজেপি চৰকাৰখনে বিভিন্ন কৌশল প্ৰয়োগ কৰি কংগ্রেছৰ গতি ৰোধ কৰাৰ চেষ্টা কৰি আছে। আমি বিজেপিক সকীয়াই দিওঁ যে তেওঁলোকে যিমানেই আমাৰ গতি ৰোধ কৰিবলৈ চেষ্টা নকৰক কিয় আমি আৰু অধিক দুৰন্ত গতিৰে আগবাঢ়িম।”
এই কাৰ্যসূচীত উপস্থিত থাকি বিৰোধী দলৰ দলপতি দেৱব্ৰত শইকীয়াই কয়, “গর্জন মুছাহাৰীৰ যোগদানে BTR ত কংগ্রেছ দলক অধিক শক্তিশালী কৰি তুলিব”।
আনহাতে, কংগ্রেছ দলত যোগদান কৰি PJACBM ৰ নেতা মছাহাৰিয়ে কয়, “আমি বড়োভূমিৰ জনসাধাৰণৰ শান্তিৰ বাবে দীৰ্ঘদিন ধৰি আন্দোলন চলাইছিলো। কিন্ত আজিৰ এই বিজেপি চৰকাৰ খনৰ শাসনকালত বড়োভূমিৰ মানুহৰ মাজত থকা শান্তি-সম্প্ৰীতি বিঘ্নিত হৈছে। অসমত শান্তি ঘূৰাই আনিবলৈ হ’লে কংগ্রেছ দল শাসনত আহিবই লাগিব। সেয়ে ভাৰতীয় জাতীয় কংগ্ৰেছ দলৰ নীতি আদৰ্শৰ প্ৰতি আকৰ্ষিত হৈ কংগ্রেছ দলত যোগদান কৰিছো।‘’
মুখ্য আহ্বায়ক গৰ্জন মছাহাৰীৰ উপৰি ভাৰতীয় জাতীয় কংগ্ৰেছ দলত যোগদান কৰা PJACBM ৰ বিষয় ববীয়া সকল হৈছে- মজুমদাৰ ব্ৰহ্ম, বীৰেশ্বৰ বসুমতাৰী, যোচেফ বসুমতাৰী, মনমোহন ব্ৰহ্ম, পিয়ুছ নাৰ্জাৰী, প্ৰিন্স ওৱাৰী, নৰেশ বসুমতাৰী, হিৰণ্য ব্ৰহ্ম, অমিত বসুমতাৰী, লিনুষ নাৰ্জাৰী, ৰাজু ব্ৰহ্ম, মাইকেল তুডু, ফৰমইলং ব্ৰহ্ম, চৰা চাংমা, হাবিল আলি এছ কে আৰু মনমোহন ব্ৰহ্ম।
