কলকাতাস্থিত মাৰ্কিন কনচুল জেনেৰেলৰ কাৰ্যালয়ত কনচুল জেনেৰেল হিচাবে যোগদান কৰিলে মেলিণ্ডা পাভেকে।
মাৰ্কিন কনচুল জেনেৰেল পাট্টি হফমেনৰ ঠাইত মেলিণ্ডাই কাৰ্যভাৰ গ্ৰহণ কৰিছে।
ভাৰত-মাৰ্কিন সম্পৰ্ক ক্ৰমাৎ উন্নত হৈ অহাৰ সময়তে কলকাতাৰ মাৰ্কিন কনচুল জেনেৰেলৰ কাৰ্যালয়ত মেলিণ্ডাৰ যোগদানে বিশেষ আশাৰ বতৰা কঢ়িয়াই আনিছে।
উল্লেখ্য কলকাতাৰ কনচুল জেনেৰেলৰ কাৰ্যালয়ে উত্তৰ পূৰ্বাঞ্চলৰ সাত খন ৰাজ্যৰ লগতে পশ্চিমবংগ,ঝাৰখণ্ড,ছিকিম, বিহাৰ আদি ৰাজ্য সামৰি লয়।
এই ৰাজ্য কেই খনৰ খা-খবৰ আদি কলকাতাত থকা মাৰ্কিন কনচুল জেনেৰেলৰ কাৰ্যালয়ৰ পৰাই ৱাশ্বিংটনে লাভ কৰে।
নতুন কনচুল জেনেৰেল হিচাবে দায়িত্ব গ্ৰহণ কৰিয়েই মেলিণ্ডাই কয় ‘ মই এই দায়িত্ব গ্ৰহণ কৰাৰ পিছত উত্তৰ-পূৰ্বাঞ্চলৰ লগতে পূব ভাৰতৰ কেইবাখনো ৰাজ্যক আমেৰিকাৰ হৈ প্ৰতিনিধিত্ব কৰাৰ সুযোগ পাইছো’।
এই অঞ্চল সমূহৰ সাধাৰণ জনতাক সাক্ষাত কৰি তেওঁ তেওঁলোকৰ মনৰ কথা জানিবলৈ চেষ্টা চলাব বুলিও মেলিণ্ডাই কয়।
কলকাতাত মাৰ্কিন কনচুল জেনেৰেল হিচাবে যোগদান কৰাৰ পূৰ্বে মেলিণ্ডাই টকিঅ’ৰ মাৰ্কিন দূতাবাসত কৰ্মৰত আছিল।
তেওঁ পাকিস্তানস্থিত মাৰ্কিন দূতাবাসতো কাম কৰিছিল।
মাৰ্কিন চৰকাৰৰ হৈ তেওঁ নেপালৰ কাঠমাণ্ডু,ইৰাকৰ বাগদাদ,পাকিস্তানৰ লাহোৰ আদি স্থানতো সেৱা আগবঢ়াইছিল।
২০০৪ চনত তেওঁ আমেৰিকাৰ গৃহ বিভাগত যোগদান কৰিছিল।
তেওঁ ইলিয়নছৰ অগষ্টানা কলেজৰ পৰা ৰাজনীতি বিজ্ঞান, অৰ্থনীতি আৰু এছিয়ান ষ্টাডিজ বিষয়ত স্নাতক ডিগ্ৰী অৰ্জন কৰাৰ পিছত মিনেচটা বিশ্ববিদ্যালয়ৰ পৰা এমবিএ ডিগ্ৰী গ্ৰহণ কৰিছিল।
