বিধানসভাৰ নিৰ্বাচনৰ পূৰ্বে গুজৰাটত শাসনাধীষ্ঠ বিজেপিত নেতৃত্ব সলনিৰ নতুন সমীকৰণ! ৰাজ্যখনৰ মুখ্যমন্ত্ৰী পদৰ পৰা পদত্যাগ কৰিলে বিজয় ৰূপানিয়ে।
উত্তৰাখণ্ড আৰু কৰ্ণাটকৰ পাছত এইবাৰ গুজৰাটত নিৰ্বাচনৰ পূৰ্বে বিজেপিয়ে নেতৃত্ব সলনি কৰিলে।
কিন্তু ৰূপানিৰ পদত্যাগৰ পাছতে এতিয়া প্ৰশ্ন হৈছে গুজৰাটৰ পৰৱৰ্তী মুখ্যমন্ত্ৰী কোন হ’ব?
গুজৰাটৰ মুখ্যমন্ত্ৰী পদৰ বাবে দলৰ ভিতৰত চাৰি-পাঁচজন নেতাৰ নাম চৰ্চিত হৈ আছে। ইয়াৰ ভিতৰত আছে পুৰুষোত্তম ৰূপালা, উপ মুখ্যমন্ত্ৰী নিতীন পেটেল আৰু কেন্দ্ৰীয় স্বাস্থ্যমন্ত্ৰী মনসুখ মাণ্ডৱ্য।
এতিয়ালৈ কোনো এজনৰ নামেই চূড়ান্ত হোৱা নাই যদিও কেন্দ্ৰীয় স্বাস্থ্যমন্ত্ৰী মনসুখ মাণ্ডৱ্য মুখ্যমন্ত্ৰিত্বৰ দৌৰত সকলোতকৈ আগবাঢ়ি আছে বুলি ৰাজনৈতিক বিশ্লেষকসকলে অনুমান কৰিছে।
সন্মুখত বিধানসভাৰ নিৰ্বাচন থকালৈ চাই এয়া কেবল মুখ্যমন্ত্ৰী সলনি কৰা বিষয় নহয়, বৰঞ্চ গুজৰাটত বিজেপিক ধৰি ৰখাৰ যুঁজৰ কথাও আছে। সেয়েহে, এনে পৰিস্থিতিত নতুন মুখ্যমন্ত্ৰীৰ সন্মুখত থাকিব এক বৃহৎ প্ৰত্যাহ্বান।
বৰ্তমান কেন্দ্ৰীয় স্বাস্থ্যমন্ত্ৰীৰ দায়িত্ব লাভ কৰা মনসুখ মাণ্ডৱ্য প্ৰধানমন্ত্ৰী নৰেন্দ্ৰ মোদীৰ ঘনিষ্ঠ হোৱাৰ সূত্ৰে মুখ্যমন্ত্ৰী পদৰ প্ৰধান দাবীদাৰ হিচাপে তেওঁক ৰখা হৈছে।
আনহাতে, ৰাজ্যসভাৰ সাংসদ পুৰুষোত্তম ৰূপালাৰ সাংসদৰ কাৰ্যকাল শেষ হ’বলৈ আৰু চাৰি মাহ বাকী আছে। পাতিদাৰ সম্প্ৰদায়ৰ জনপ্ৰিয় নেতাগৰাকী এসময়ত ৰাজ্যিক বিজেপিৰ সভাপতিও আছিল। সেয়ে, তেওঁকো মুখ্যমন্ত্ৰী পদৰ অন্যতম দাবীদাৰ বুলি ধৰা হৈছে।
ইপিনে, মুখ্যমন্ত্ৰী পদৰ আন এগৰাকী অন্যতম দাবীদাৰ হিচাপে চৰ্চাত আছে ৰাজ্যখনৰ উপ মুখ্যমন্ত্ৰী নিতীন পেটেল। পেটেলে স্বাস্থ্য, চিকিৎসা শিক্ষা, পৰিয়াল কল্যাণ, গড়কাপ্তানিৰ দৰে একাধিক বিভাগৰ মন্ত্ৰিত্বৰ দায়িত্ব চম্ভালিছে।
সেইদৰে একাংশ সূত্ৰৰ মতে গুজৰাট বিজেপিৰ সভাপতি চন্দ্ৰকান্ত ৰঘুনাথ পাটিলো মুখ্যমন্ত্ৰী পদৰ আন এক দাবীদাৰ।
অৱশ্যে, আজিয়েই গুজৰাটৰ পৰৱৰ্তী মুখ্যমন্ত্ৰী কোন হ’ব সেইটো নিশ্চিত কৰিব বিজেপিৰ কেন্দ্ৰীয় নেতৃত্বই।
