পঞ্জাৱ কংগ্ৰেছৰ মুৰব্বীপদ ত্যাগ কৰাৰ দুদিন পিছত নৱজ্যোত সিং সিদ্ধুৱে বৃহস্পতিবাৰে আবেলি চণ্ডিগড়ৰ পঞ্জাৱ ভৱনত মুখ্যমন্ত্ৰী চৰণজিৎ সিং চান্নীক “আলোচনাৰ বাবে” সাক্ষাৎ কৰিব।
সিদ্ধুৱে কয় যে তেওঁ “যিকোনো আলোচনা”ৰ বাবে সাজু হৈ আছে।
“মুখ্যমন্ত্ৰীয়ে মোক আলোচনাৰ বাবে আমন্ত্ৰণ জনাইছে… আজি আবেলি ৩:০০ বজাত চণ্ডিগড়ৰ পঞ্জাৱ ভৱনত উপস্থিত হৈ আলোচনাত মিলিত হ’ব, যিকোনো আলোচনাৰ বাবে তেওঁক স্বাগতম জনোৱা হৈছে।” সিদ্ধুৱে টুইটাৰত লিখিছে।
সিদ্ধুৰ পদত্যাগে পঞ্জাৱ কংগ্ৰেছ দলৰ আভ্যন্তৰত নতুন সংকটৰ সৃষ্টি কৰিছিল। মুখ্যমন্ত্ৰী চৰণজিৎ সিং চান্নীয়ে বুধবাৰে কৈছিল যে তেওঁ সিদ্ধুক আলোচনাৰ বাবে আমন্ত্ৰণ জনাইছে।
চন্নীয়ে কয়, “দলৰ সভাপতি পৰিয়ালটোৰ মুৰব্বী। মুৰব্বীয়ে পৰিয়ালৰ ভিতৰত বিষয়বোৰ আলোচনা কৰা উচিত। মই আজি সিদ্ধুৰ সৈতে কথা পাতিছো আৰু তেওঁক আলোচনাৰ বাবে আমন্ত্ৰণ জনাইছো। মই তেওঁক কৈছো যে দলৰ আদৰ্শ সৰ্বোচ্চ আৰু এখন চৰকাৰে সেই আদৰ্শ অনুসৰণ কৰে।যদি তেওঁৰ কোনো সমস্যা থাকে, আমি সেইবোৰ কথা আলোচনা কৰিব পাৰোঁ।”
বুধবাৰে সিদ্ধুৱে এটা ভিডিঅ’ শ্বেয়াৰ কৰিছিল য’ত তেওঁ কৈছিল যে তেওঁ তেওঁৰ নৈতিকতাৰ সৈতে আপোচ কৰিবলৈ ইচ্ছুক নহয়। ইয়াৰ লগতে তেওঁ পদত্যাগ কৰাৰ কথা ঘোষণা কৰিছিল ।
“সমস্যাৰ সৈতে আপোচ কৰা কাৰ্যক মই সমৰ্থন জনাব নোৱাৰোঁ । মই মোৰ গুৰুৰ বাবে-ন্যায়ৰ বাবে যুঁজ দিয়াৰ প্ৰতিশ্ৰুতি দিছিলো।” গুৰু গ্ৰন্থ চাহিবৰ কথা উল্লেখ কৰি তেওঁ কয়।
লগতে সিদ্ধুৱে মন্তব্য কৰে, “মই হাইকমাণ্ডক বিপথে পৰিচালিত নকৰোঁ বা হাইকমাণ্ডক বিপথে পৰিচালিত হ’বলৈ দিব নোৱাৰো। মই মোৰ গুৰুৰ ওচৰত ন্যায়ৰ বাবে যুঁজ দিয়াটো উপযুক্ত পথ হিচাপে বিবেচনা কৰোঁ। মই যিকোনো পদ ত্যাগ কৰিবলৈ সক্ষম।”
মন্ত্ৰীসকলক দপ্তৰ আৱণ্টন কৰাৰ কিছু মুহূৰ্তৰ পিছত সিদ্ধুৱে মঙলবাৰে শীৰ্ষ পদৰ পৰা পদত্যাগ কৰে।
উপ মুখ্যমন্ত্ৰী সুখজিন্দৰ সিং ৰন্ধাৱাক দিয়া গৃহ বিভাগৰ দপ্তৰৰ বাবে তেওঁ অসন্তুষ্ট হোৱা বুলি জানিব পৰা গৈছে। তেওঁ ইয়াৰ বিৰোধিতা কৰি আহিছিল।
পৰম্পৰা অনুসৰি গৃহ বিভাগৰ দায়িত্ব মুখ্যমন্ত্ৰীৰ হাতত থাকিব লাগে বুলি সিদ্ধুৱে মন্তব্য কৰিছিল।
