এইবাৰ হেকাৰে লক্ষ্য কৰি লৈছে বঙাইগাঁও জিলা কৃষি বিভাগৰ ৱেবচাইট৷ হেকাৰে কৃষি বিভাগৰ ৱেব চাইট হেক কৰি চৰকাৰী আঁচনিৰ সুবিধা লাভ কৰিবলগীয়া প্ৰকৃত হিতাধিকাৰীৰ সৈতে ভুৱা হিতাধিকাৰীৰ নাম অন্তৰ্ভুক্ত কৰি ধন লুণ্ঠনৰ বাবে অহৰহভাৱে চেষ্টা চলাই গৈছে ৷
কিন্তু জিলা কৃষি বিভাগৰ বিষয়া – কৰ্মচাৰীসকলৰ তৎপৰতাত সফল হ’ব পৰা নাই অসৎ চক্ৰটো ৷
জিলা কৃষি বিষয়া সঞ্জয় সেনগুপ্তাই জানিবলৈ দিয়া মতে জিলা কৃষি বিভাগৰ প্ৰধানমন্ত্ৰী কিষান সন্মান নিধিৰ পৰ্টেল চাৰ্ভাৰ প্ৰথম অৱস্থাত যোৱা ১৭ জুলাইৰ পৰা ২৮ জুলাইলৈ হেক কৰিছিল ৷
এই সময়ছোৱাত দুহাজাৰ ভুৱা পি এম কিষান সন্মান নিধিৰ হিতাধিকাৰী অন্তৰ্ভুক্ত হৈছিল ৷
প্ৰথমে বিষয়টো কাৰিকৰী বিসংগতিৰ হোৱা বুলি ভবা হৈছিল আৰু অন্তৰ্ভুক্ত হোৱা ভুৱা হিতাধিকাৰীৰ নামসমূহ আঁতৰাই পেলোৱা হৈছিল ৷ কিন্তু ইয়াৰ পিছতো অহৰহভাৱে নাম অন্তৰ্ভুক্তিৰ চেষ্টা চলাই আহিছে দুষ্ট চক্ৰই ৷
ইয়াৰ মাজতে পুনৰ দ্বিতীয়বাৰ ২৭ চেপ্টেম্বৰৰ পৰা চাৰিদিনৰ বাবে হেক কৰে পি এম কিষান পৰ্টেলটো ৷
এইবাৰ সাতশ ভুৱা হিতাধিকাৰী অন্তৰ্ভূক্ত হয় এই আঁচনিত ৷
বিষয়টো ধৰা পৰাত লগে লগে বিভাগীয় উৰ্ধতম কৰ্তৃপক্ষক অৱগত কৰা হয় আৰু আঁচনিত অন্তৰ্ভুক্ত হোৱা ভুৱা হিতাধিকাৰীসকলৰ নাম আঁতৰাই দিয়া হয় ৷
জিলা কৃষি বিষয়াগৰাকীয়ে জানিবলৈ দিয়া মতে ভুৱা হিতাধিকাৰীসকলৰ ঠিকনা বঙাইগাঁও জিলা দেখুওৱা হৈছে যদিও যোগাযোগ কৰিলে কোনোবা মৰিগাঁও তথা আন ঠাইৰ ওলায় ৷
এই ঘটনা সন্দৰ্ভত জিলা কৃষি বিষয়াই আৰক্ষীৰ ওচৰত এজাহাৰ দাখিল কৰিছে ৷ ইপিনে চৰকাৰী আঁচনিৰ ধন লুণ্ঠনৰ বাবে যে এতিয়া এক দুষ্ট চক্ৰ সক্ৰিয় হৈ পৰিছে সেয়া এই ঘটনাই উন্মোচিত কৰিছে ৷
