তিনিচুকীয়া জিলাৰ মাৰ্ঘেৰিটা মহকুমাৰ লিডু বজাৰৰ জগদীশ চৌহান নামৰ ব্যক্তিৰ গৃহত টিপংস্থিত ৰাজপুতনা ৰাইফলচ-আৰক্ষীৰ অভিযানত ৪৭ লাখ ৫০ হাজাৰ টকা উদ্ধাৰকলৈ চাঞ্চল্যৰ সৃষ্টি হৈছে।
লিডু আৰক্ষী চকীৰ অন্তৰ্গত লিডু বজাৰৰ জগদীশ চৌহান নামৰ শুকান মাছৰ ব্যৱসায়ীৰ গৃহত দেওবাৰে নিশা অতৰ্কিতে টিপংস্থিত ৰাজপুতনা ৰাইফলচ আৰু আৰক্ষীয়ে যুটীয়াভাৱে অভিযান চলায়।
ড্ৰাগছ আৰু অস্ত্ৰ- শস্ত্ৰ সৰবৰাহত জড়িত থকাৰ সন্দেহতে অভিযান চলায় যদিও তেনেই সাধাৰণ জুপুৰী গৃহটোত তালাচী চলাওঁতে উদ্ধাৰ হয় ৪৭ লাখ ৫০ হাজাৰ টকা।
জগদীশ চৌহান নামৰ ৭০ উৰ্ধৰ ব্যক্তিজনে উক্ত ধন শুকান মাছৰ ব্যৱসায়েৰে উপাৰ্জন কৰা তথা উক্ত ধন ঘৰ বনাবলৈ জমা কৰি ৰখা বুলি মন্তব্য প্ৰকাশ কৰিছে।
পকী ঘৰ বনাবলৈ এটি জৰাজীৰ্ণ গৃহত ৪৭ লাখ ৫০ হাজাৰকৈ টকা নগদ ৰখাকলৈ প্ৰশ্ন উত্থাপন হৈছে।
এই সন্দৰ্ভত আৰক্ষীয়ে-সেনাই সংবাদমাধ্যমৰ আগত বাতৰি প্ৰস্তত কৰা সময়লৈকে কোনো মন্তব্য প্ৰকাশ কৰা নাই।
সমগ্ৰ ঘটনাটোৱে সমগ্ৰ তিনিচুকীয়া জিলাখনতে ৰহস্যৰ সৃষ্টি কৰিছে।
আনহাতে, এক সূত্ৰই জানিবলৈ দিয়া অনুসৰি কিছু বছৰ পূৰ্বে নিষিদ্ধ ঘোষিত উগ্ৰপন্থী আলফাৰ লগত যোগাযোগ ৰক্ষাৰ বাবে জগদীশক আৰক্ষীয়ে আটক কৰিছিল। অৱশ্যে আৰক্ষীৰ তদন্তহে প্ৰকৃত কাৰণ জানিব পৰা যাব ।
উল্লেখ্য যে অৰুণাচলৰ মেও আৰু মাৰ্ঘেৰিটাৰ লিডু আদি অঞ্চলত সুদীৰ্ঘ দিন ধৰি অতি সাধাৰণভাৱে শুকান মাছৰ ব্যৱসায় কৰি আহিছিল ৭০ উৰ্ধৰ ব্যক্তিৰ জনে।
তেনে এজন সাধাৰণ ব্যক্তিৰ গৃহত বৃহৎ পৰিমাণৰ ধন উদ্ধাৰৰ ঘটনাই সকলোৰে চকু কপালত তুলিছে।
