বঙাইগাঁও সদৰ থানাৰ অন্তৰ্গত চাপৰাকাটাৰ ভোছামাৰীত যোৱা সন্ধিয়া সংঘটিত দুটাকৈ পৃথক পৃথক পথ দুৰ্ঘটনাত এজন চাইকেল আৰোহীৰ মৃত্যু হোৱাৰ বিপৰীতে এখন ই- ৰিক্সাৰ পাঁচগৰাকী যাত্ৰী কম- বেছি পৰিমাণে আহত হয় ৷
ৰাখালডুবিৰ দিশৰ পৰা বঙাইগাঁৱৰ দিশে আহি থকা এ এচ ০১ বি কিউ ০২১০ নম্বৰৰ এখন মাৰুতী আৰু ৰাখালডুবিৰ দিশে গৈ থকা এখন ই – ৰিক্সাৰ মাজত সংঘটিত মুখামুখি সংঘৰ্ষৰ ফলত ই- ৰিক্সাখনত থকা চাৰিগৰাকীকৈ যাত্ৰী গুৰুতৰভাৱে আহত হোৱাৰ লগতে আন এজন যাত্ৰীও আহত হয় ৷
পিচত আহতসকলক স্থানীয় লোকে উদ্ধাৰ কৰি চিকিৎসাৰ বাবে বঙাইগাঁৱৰ এখন ব্যক্তিগত হাস্পতাললৈ প্ৰেৰণ কৰে ৷
দুৰ্ঘটনাটোত ডালিম ৰায়(৪৬), নীৰেন বৰুৱা(৫০), মিনাক্ষী ৰায় (৩৫) আৰু অনিতা ৰায় (২৫) আহত হৈ চিকিৎসাধীন হ’বলগীয়া হয় ৷
আহতসকলৰ ঘৰ জিলাখনৰ অভয়াপুৰী থানাৰ অন্তৰ্গত সোণাখুলী আৰু চাৰিপুনীয়াত বুলি জানিব পৰা গৈছে ৷
আনহাতে একেটা স্থানতে কিছু সময় পিছতে সংঘটিত হয় আন এক দুৰ্ঘটনা ৷ এজন চাইকেল আৰোহীক ৰাখালডুবি অভিমুখে গৈ থকা চাৰিচকীয়া বাহনে খুন্দিয়াই থৈ যায় ৷
পিছত লোকজনক উদ্ধাৰ কৰি চিকিৎসালয়লৈ প্ৰেৰণ কৰা হয় যদিও চিকিৎসকে লোকজনক মৃত বুলি ঘোষণা কৰে ৷
মৃত লোকজন বঙাইগাঁও জিলাৰ অভয়াপুৰী থানাৰ অন্তৰ্গত ২ নং সোণাখুলীৰ মংগল সিং ৰায় (৫১) বুলি চিনাক্ত কৰা হয় ৷
যান বাহন আৰক্ষীয়ে জানিবলৈ দিয়া মতে ই- ৰিক্সাখনে পথৰ ভুল দিশেৰে গৈ থকাৰ বাবে প্ৰথমটো দুৰ্ঘটনা সংঘটিত হয় ৷
আনহাতে ৰাখালডুবিৰ দিশে গৈ থকা চাইকেল আৰোহীজনে উক্ত স্থান পোৱাত পথৰ সোঁফালে কিছু সময় পূৰ্বে সংঘটিত হোৱা পথ দুৰ্ঘটনাস্থলীলৈ বুলি বাওঁফালৰ পৰা পথ অতিক্ৰম কৰি আহিবলৈ লোৱাৰ সময়তে ৰাখালডুবিৰ দিশে তীব্ৰ বেগে গৈ থকা এখন চাৰিচকীয়া বাহনে লোকজনক খুন্দিয়াই থৈ পলায়ন কৰে ৷
অৱশ্যে লোকজনক খুন্দিয়াই থৈ যোৱা বাহনখনৰ নম্বৰপ্লেট এখন উক্তস্থানত পৰি যোৱাত স্থানীয় লোকে নম্বৰপ্লেটখন উদ্ধাৰ কৰি পিছত যান বাহন আৰক্ষীক চমজাই দিয়ে ৷
উদ্ধাৰ হোৱা নম্বৰপ্লেটখন অনুসৰি বাহনখনৰ নম্বৰ হ’ল এ এচ ০১ এ ৱাই ৭২৮২ ৷
