উচ্চতম ন্যায়ালয়ে বুধবাৰে পেগাচাছ ছফ্টৱেৰ ব্যৱহাৰৰ অনুমোদিত নিৰীক্ষণৰ অভিযোগৰ স্বতন্ত্ৰ তদন্ত বিচৰা আৱেদনৰ ওপৰত ৰায় ঘোষণা কৰিব।
বিষয়টো পুৱা ১০.৩০ বজাত ভাৰতৰ মুখ্য ন্যায়াধীশ এন ভি ৰমনাৰ নেতৃত্বত এখন বিচাৰপীঠৰ সন্মুখত তালিকাভুক্ত কৰা হৈছে।
আদালতত পেগাচাছ গোচৰত ১২ খন আৱেদন নিৰ্ধাৰণ কৰা হৈছে, যাৰ ভিতৰত আছে এডিটৰ্ছ গিল্ড অফ ইণ্ডিয়াৰ দ্বাৰা দাখিল কৰা আৱেদন; সাংবাদিক এন ৰাম আৰু শশী কুমাৰ, প্ৰাণজয় গুহ ঠাকুৰতা; তৃণমূল কংগ্ৰেছৰ নেতা যশৱন্ত সিনহা আৰু একাডেমিক জগদীপ এছ ছোকাৰে দাখিল কৰা আবেদন।
শীৰ্ষ আদালতে ১৩ ছেপ্টেম্বৰত বিভিন্ন পক্ষৰ শুনানিৰ পিছত আৱেদনসমূহৰ ওপৰত ইয়াৰ আদেশ স্থগিত ৰাখিছিল।
কেন্দ্ৰই অবৈধ নিৰীক্ষণ সম্পৰ্কীয় সকলো অভিযোগ দ্ব্যর্থহীনভাৱে অস্বীকাৰ কৰিছে আৰু আদালতক কাৰিকৰী বিশেষজ্ঞৰ এখন সমিতি গঠন কৰিবলৈ অনুমতি দিবলৈ আহ্বান জনাইছে।
১৫ আগষ্টত দাখিল কৰা এক চমু শপতনামাত চৰকাৰে কৈছিল যে কিছুমান নিহিত স্বাৰ্থৰ দ্বাৰা বিয়পি পৰা যিকোনো ভুল আখ্যান দূৰ কৰাৰ লক্ষ্যৰে আৰু উত্থাপিত বিষয়বোৰ পৰীক্ষা কৰাৰ উদ্দেশ্যেৰে বিশেষজ্ঞৰ এখন সমিতি গঠন কৰিব যি বিষয়টোৰ পুংখানুপুংখ বিশ্লেষণ কৰিব।
কিন্তু আৱেদনকাৰীসকলে সমিতি গঠনৰ চৰকাৰী অনুৰোধৰ বিৰোধিতা কৰিছিল।
২৩ ছেপ্টেম্বৰত উচ্চতম ন্যায়ালয়ে পেগাচাছ গোচৰৰ শুনানিৰ সময়ত ইংগিত দিছিল যে আদালতে অভিযোগসমূহ বিচাৰৰ বাবে বিশেষজ্ঞৰ এখন সমিতি নিয়োগ কৰিব।
উল্লেখ্য যে আবেদনকাৰীসকলে আদালতক চৰকাৰক পেগাচাছ ক্ৰয় কৰিছে নে ব্যৱহাৰ কৰিছে সেয়া প্ৰকাশ কৰিবলৈ নিৰ্দেশ দিবলৈ আহ্বান জনাইছিল।
আদালতে চৰকাৰে নিজৰ স্থিতি স্পষ্ট কৰি কোনো শপতনামা দাখিল কৰিব বিচাৰে নেকি বুলি কৰা প্ৰশ্নৰ উত্তৰত কেন্দ্ৰই কৈছিল যে বিষয়টো ৰাষ্ট্ৰীয় সুৰক্ষাৰ প্ৰশ্নৰে ভৰপূৰ আৰু সেয়েহে ই আদালতত দাখিল কৰিবলগা ৰাজহুৱা শপতনামাত বিৱৰণ দিব নিবিচাৰে।
চৰকাৰে ডমেইন বিশেষজ্ঞৰ সমিতিৰ ওচৰত শপতনামা দাখিল কৰাৰ প্ৰস্তাৱ দিছিল, যিয়ে আদালতত প্ৰতিবেদন দাখিল কৰিব পাৰে।
ইয়াৰ প্ৰত্যুত্তৰত উচ্চতম ন্যায়ালয়ে কৈছিল যে, “আমি সুৰক্ষা, প্ৰতিৰক্ষা বা আন কোনো ৰাষ্ট্ৰীয় স্বাৰ্থৰ বিষয়ৰ বিষয়ে চিন্তিত বিষয়বোৰ জানিবলৈ কোনো ধৰণে আগ্ৰহী নহয়। কিছু নিৰ্দিষ্ট নাগৰিক, সাংবাদিক, উকীল আদিৰ বিৰুদ্ধে পেগাচাছ ছফ্টৱেৰ ব্যৱহাৰ কৰা হৈছিল বুলি অভিযোগৰ ক্ষেত্ৰত আমি কেৱল চিন্তিত, এই ছফ্টৱেৰটো চৰকাৰে আইনৰ অধীনত অনুমোদিত হোৱাৰ বাহিৰে আন কোনো পদ্ধতিৰে ব্যৱহাৰ কৰিছে নেকি জানিবলৈ আমি ইচ্ছুক।”
উল্লেখ্য যে কেইবাজনো ৰাজহুৱা কৰ্মী, সাংবাদিক আৰু ৰাজনীতিবিদৰ ফোন টেপ কৰিবলৈ ছফ্টৱেৰৰ অবৈধ ব্যৱহাৰৰ অভিযোগৰ সংবাদ মাধ্যমত প্ৰকাশ পোৱাৰ পিছত পেগাচাছ বিতৰ্ক শিৰোনামলৈ আহিছিল।
পৰৱৰ্তী সময়ত উচ্চতম ন্যায়ালয়ত অভিযোগটোৰ তদন্ত বিচাৰি কেইবাখনো আবেদন দাখিল কৰা হৈছিল।
