কোভিডত আক্ৰান্ত হৈ অসম চৰকাৰৰ অৱসৰপ্ৰাপ্ত বিষয়া বৰ্তমান মহানগৰীৰ বাসিন্দা ধীৰেন গোস্বামীৰ যোৱা বুধবাৰে বিয়লি ৫-৩০বজাত মহানগৰীৰ এপ’ল’ হাস্পাতালত পৰলোকপ্ৰাপ্তি ঘটে।
যোৱা ৬ অক্টোবৰৰ পৰা অসুস্থ অনুভৱ কৰা গোস্বামীৰ কোভিড টেষ্ট কৰাত পজিটিভ ধৰা পৰে যদিও চিকিৎসাৰ পাছত নিগেটিভ আহে।
কিন্তু নিগেটিভ অহাৰ পাছতো গোস্বামীৰ স্বাস্থ্যৰ ক্ৰমে অধিক অৱনতি হ’বলৈ ধৰে আৰু অৱশেষত বুধবাৰে বিয়লি শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স হৈছিল ৬৬বছৰ।
গোস্বামীৰ জন্মস্থান আছিল পাঠশালাৰ বেতকুছি নামৰ গাঁৱত আৰু পাছলৈ তেওঁ মহানগৰীৰ বাসিন্দা হয়।
সৰুৰে পৰা এগৰাকী মেধাৱী ছাত্ৰ হিচাপে সুখ্যাতিৰে পাঠশালাত স্কুলীয়া শিক্ষা সাং কৰি পাছত কটন কলেজৰ পৰা এমএছচি ডিগ্ৰী লয়।
গোস্বামীয়ে অসম লোকসেৱা আয়োগৰ পৰীক্ষাত উত্তীৰ্ণ হৈ বিভিন্ন পদত সেৱা আগবঢ়োৱাৰ পাছত অসম চৰকাৰ শ্ৰম বিভাগৰ ডেপুটি লেবাৰ কমিছনাৰ হিচাপে অৱসৰ গ্ৰহণ কৰিছিল।
এগৰাকী সৰবৰাহী তথা কৰ্মপ্ৰাণ ব্যক্তি গোস্বামীয়ে কবিতাও লিখিছিল আৰু সমসাময়িক সমাজ জীৱনৰ বিভিন্ন বিষয়ৰ ওপৰত নিজৰ সুচিন্তিত বক্তৱ্য আগবঢ়াইছিল।
মৃত্যুৰ সময়ত গোস্বামীয়ে পত্নী, দুজন পুত্ৰ আৰু এগৰাকী বোৱাৰীক এৰি থৈ গৈছে।
গোস্বামী অসমীয়া চলচ্চিত্ৰ জগতৰ প্ৰসিদ্ধ অভিনেত্ৰী অমলা কটকীৰ দ্বিতীয় জোৱাই আছিল।
