ৰাজ্যৰ পাঁচটা সমষ্টিত কাইলৈ অনুষ্ঠিত হ’ব উপ নিৰ্বাচন। নিৰ্বাচনত প্ৰতিদ্বন্দীতা কৰা বিভিন্ন দলৰ তথা নিৰ্দলীয় প্ৰাৰ্থীৰ ৰাজনৈতিক ভৱিষ্যতক নিৰ্ণয় কৰিব ৫ টা সমষ্টিৰ ভোটাৰে।
এই ৫ টা সমষ্টিৰ ভিতৰত ইতিমধ্যেই চৰ্চাৰ শীৰ্ষত আছে থাওৰা বিধানসভা সমষ্টি। ৰাজ্যৰ শাসক দলৰ ৰথী-মহাৰথী থাওৰা সমষ্টিত নিৰ্বাচনী প্ৰচাৰৰ বাবে উবুৰি খাই পৰাৰ পাছত থাওৰা ৰাজ্যৰ দ্বিতীয় ৰাজধানীত পৰিণত হোৱা বুলি ব্যঙ্গ কৰিছে বিভিন্নজনে।
১০৭ নং থাওৰা বিধান সভা সমষ্টিৰ উপ নিৰ্বাচনক কেন্দ্ৰ কৰি তৎপৰতা বৃদ্ধি পাইছে শিৱসাগৰ জিলা প্ৰশাসনৰ। আজি পুৱা আঠ বজাৰ পৰা শিৱসাগৰ চৰকাৰী উচ্চতৰ মাধ্যমিক বিদ্যালয়ত স্থাপন কৰা ষ্টং ৰোমাৰ পৰা ইভিএমকে ধৰি বিভিন্ন নিৰ্বাচনী সামগ্ৰী লৈ নিজ নিজ ভোট কেন্দ্ৰলৈ গৈছে পুলিং, পিজাইডিং তথা আন আন বিষয়া কৰ্মচাৰী সকলৰ লগতে নিৰাপত্তাৰক্ষী সকল।
ইপিনে ক’ভিডৰ সংক্ৰমণৰ প্ৰতি লক্ষ্য ৰাখি জিলা প্ৰশাসনে প্ৰতিটো ভোট কেন্দ্ৰ চেনিটাইজেশ্যন কৰাৰ লগতে ভোট দানৰ সময়ত ভোটাৰক মাস্ক হেণ্ডগ্লভজ দিয়াৰ ব্যৱস্থা কৰিছে বুলি জানিবলৈ দিয়ে জিলা উপায়ুক্তই।
আনহাতে থাওৰা উপ নিৰ্বাচন সফল আৰু শান্তিপূৰ্ণ ভাৱে অনুষ্ঠিত কৰিবলৈ ৮০০ নিৰাপত্তাৰক্ষী নিয়োগ কৰা হৈছে বুলি জানিবলৈ দিয়ে জিলা আৰক্ষী অধীক্ষক ৰাকেশ ৰোচনে।
