Australia lost its Glory ক’ত হেৰাল অষ্ট্ৰেলিয়াৰ সেই আধিপত্য? এসময়ত ধাৰাবাহিকভাৱে জয়ৰ অভিলেখ গঢ়ি অষ্ট্ৰেলিয়াই বিশ্ব ক্ৰিকেটৰ মুকুট শিৰত পৰিধান কৰিছিল। সেই দিন যেন এতিয়া ইতিহাস হোৱাৰ পথত।
ক্ৰিকেট অনুৰাগীৰ বাবে বিশ্বাস কৰিবলৈকে টান যে এনে এক লজ্জাজনক পৰাজয়ৰ সৈতে অষ্ট্ৰেলিয়াৰ নাম সাঙোৰ খাই পৰিব।
শনিবাৰে ডুবাইত ইংলেণ্ডৰ বিৰুদ্ধে টী-২০ বিশ্বকাপৰ মেচখনত ১২৫ ৰাণতে অল আউট হৈ যোৱাৰ লগে লগেই অষ্ট্ৰেলিয়াই গঢ়িলে এক লজ্জাজনক অভিলেখ যিটো সহজে পাহৰিব পৰা নাযাব।
এই বছৰত আন্তৰ্জাতিক টী-২০ ক্ৰিকেটত মুঠ ৬বাৰ অল আউট হৈছে অষ্ট্ৰেলিয়া। আন কোনো দলে এটা বছৰত এইদৰে ইমানবাৰ আন্তৰ্জাতিক টী-২০ ক্ৰিকেটত অল আউট হোৱাৰ দৃষ্টান্ত নাই।
অষ্ট্ৰেলিয়াই এইক্ষেত্ৰত শ্ৰীলংকা আৰু ৱেষ্ট ইণ্ডিজৰ অভিলেখ ভংগ কৰে। ২০১৭চনত শ্ৰীলংকাই আন্তৰ্জাতিক টী-২০ ক্ৰিকেটত মুঠ ৫বাৰ অল আউট হৈছিল।
সেইদৰে, ৱেষ্ট ইণ্ডিজে ২০১৮চনত আন্তৰ্জাতিক টী-২০ ক্ৰিকেটত মুঠ ৫বাৰ অল আউট হৈছিল।
ডুবাইত শনিবাৰে অষ্ট্ৰেলিয়াই প্ৰথমে বেটিং কৰি নিৰ্দ্ধাৰিত ২০ অভাৰত ১২৫ ৰাণত অল আউট হয়। প্ৰত্যুত্তৰত ইংলেণ্ডে ১১.৪ অভাৰত ৫০টা বল খেলিবলৈ বাকী থকা অৱস্থাতে ৮ উইকেটৰ বৃহৎ ব্যৱধানত বিজয় সাৱ্যস্ত কৰে।
