নিষ্ঠুৰ তালিবানে আফগানিস্তান দখল কৰাৰ পিছত দেশ খনৰ সাধাৰণ জনতাই এতিয়া নৰক যন্ত্ৰণা ভোগ কৰিবলগীয়া হৈছে।
তালিবানে আফগান মহিলাসকলক ইছলামৰ দোহাই দি নানান অত্যাচাৰ কৰাৰ লগতে সংগীত উপভোগ কৰা লোকসকলকো এতিয়া আক্ৰমণৰ লক্ষ্য কৰি লৈছে।
দেশ খনৰ প্ৰাক্তন ৰাষ্ট্ৰপতি আমৰুল্লা চালেহে শেহতীয়াকৈ টুইটাৰত তালিবানৰ নৃশংসতাৰ এক ভয়াৱহ ঘটনাৰ কথা উল্লেখ কৰিছে।
প্ৰাক্তন ৰাষ্ট্ৰপতি গৰাকীয়ে তেওঁৰ টুইটাৰত এইবুলি উল্লেখ কৰিছে যে আফগানিস্তানৰ নানগাৰহাৰ প্ৰদেশৰ এখক বিবাহ অনুষ্ঠানত সমৱেত লোকসকলে গীত বজাই আছিল।
সেইসময়তে গীত বজোৱাৰ অপৰাধত তালিবানে বিবাহস্থলীত উপস্থিত হৈ যধে-মধে গুলীচালনা কৰিবলৈ ধৰে।
এই ঘটনাত ১৩ জন লোকৰ থিতাতে মৃত্যু ঘটে।
তালিবানে সংগীত শুনাটো এক প্ৰকাৰ নিষিদ্ধ কৰিছে। সংগীত শুনাটো ইছলামৰ পৰিপন্থী বুলি তালিবানপন্থী সকলে কৈ আহিছে।
কেৱল গীত শুনাৰ বাবেই তালিবানে ১৩ জনকৈ লোকক নিষ্ঠুৰ ভাবে গুলীয়াই হত্যা কৰাৰ বিষয়টোৱে এতিয়া বিশ্বজুৰি প্ৰতিক্ৰিয়াৰ সৃষ্টি কৰা দেখা গৈছে।
এই ঘটনাক কঠোৰ ভাষাৰে নিন্দা কৰি আফগানিস্তানৰ প্ৰাক্তন ৰাষ্ট্ৰপতিগৰাকীয়ে টুইটাৰত লগতে এইবুলিও লিখিছে যে বিগত ২৫ বছৰ ধৰি পাকিস্তানে তালিবানক আফগান সংস্কৃতি ধ্বংসৰ প্ৰশিক্ষণ দিছে।
আইএছআইৰ সহযোগত পাকিস্তানে আফগানিস্তানৰ মাটি দখল কৰিবলৈ অগ্ৰসৰ হোৱা বুলিও তেওঁ মন্তব্য কৰে।
