Massive blast এজন দুজন অথবা এক ডজন নহয়! এখন তৈল পৰিবাহী টেংকাৰৰ বিস্ফোৰণত মৃত্যু হৈছে ৯১ জনতকৈ অধিক লোকৰ।
এই হৃদয় বিদাৰক ঘটনাটো সংঘটিত হৈছে পশ্চিম আফ্ৰিকাৰ ছিৰিয়া লিয়নীৰ ৰাজধানী চহৰত।
প্ৰকাশিত বাতৰি অনুসৰি শুকুৰবাৰে দেশখনৰ ৰাজধানী চহৰ ফ্ৰীটাউনৰ এটা পেট্ৰল ষ্টেশ্যনৰ সমীপত সংঘটিত হয় এই ভয়াৱহ বিস্ফোৰণটো।
বিস্ফোৰণৰ ফলত কিমান লোক হতাহত হৈছে সেয়া এতিয়াও স্পষ্ট হোৱা নাই।
প্ৰকাশিত বাতৰি মতে মৃত্যুৰ সংখ্যা আৰু বৃদ্ধি পোৱাৰ সম্ভাৱনা আছে। বিস্ফোৰণত কিমান লোক আহত হৈছে সেয়াও স্পষ্ট হোৱা নাই।
দেশখনৰ উপ স্বাস্থ্যমন্ত্ৰী আমাৰা জাম্বাইয়ে প্ৰকাশ কৰা অনুসৰি ৰাজধানী চহৰখনৰ বিভিন্ন হাস্পতালত প্ৰায় ১০০ গৰাকী আহত লোকক চিকিৎসাৰ বাবে ভৰ্তি কৰোৱা হৈছে।
আন্ত:ৰাষ্ট্ৰীয় সংবাদ মাধ্যমত প্ৰকাশিত বাতৰি মতে এতিয়ালৈকে ৯১ টা মৃতদেহ উদ্ধাৰ কৰিছে উদ্ধাৰকাৰী দলে।
বিস্ফোৰণৰ সঠিক কাৰণ জানিব পৰা হোৱা নাই যদিও ইন্ধন লিক্ড হোৱা টেংকাৰখনৰ পৰা তেল সংগ্ৰহ কৰিবলৈ ভিৰ জমা হোৱা ফলতে মৃতকৰ সংখ্যা এইদৰে বৃদ্ধি পালে।
উল্লেখ্যে যে ইয়াৰ পূৰ্বেও পশ্চিম আফ্ৰিকা দেশসমূহত ইন্ধন পৰিবাহী টেংকাৰ বিস্ফোৰণ ঘটনা সংঘটিত হৈছিল।
২০১৮ চনত ডেম’ক্ৰিটক ৰিপাব্লিক অৱ কংগোত আৰু ২০১৯ চনত তাঞ্জানিয়াটো সংঘটিত হৈছিল তদ্ৰূপ বিস্ফোৰণ। যি দুটা বিস্ফোৰণত মৃত্যু হৈছিল ক্ৰমে ৫০ আৰু ৮৫ গৰাকীকৈ লোকৰ।
