সদ্যসমাপ্ত ৰাজ্যখনৰ উপ–নির্বাচনত বিজয়ী হৈ অহা ৫ গৰাকী নৱনির্বাচিত বিধায়কে বৃহস্পতিবাৰে অসম বিধানসভাত শপত গ্ৰহণ কৰে। ইয়াৰ ভিতৰত তিনিগৰাকী হৈছে বিধায়ক পদ ত্যাগ কৰি কংগ্ৰেছৰ পৰা আহি বিজেপিত যোগদান কৰা ন-বিজেপি বিধায়ক।
শপত গ্ৰহণ কৰা নৱ নিৰ্বাচিত বিধায়ককেইগৰাকী হ’ল গোসাঁইগাঁৱৰ জিৰণ বসুমতাৰী (ইউপিপিএল), ভৱানীপুৰৰ ফণীধৰ তালুকদাৰ (বিজেপি), তামুলপুৰৰ জলেন দৈমাৰী (ইউপিপিএল), মৰিয়নিৰ ৰূপজ্যোতি কুর্মী (বিজেপি) আৰু থাওৰাৰ সুশান্ত বৰগোহাঁই (বিজেপি)।
বৃহস্পতিবাৰে দিনৰ ১১ বজাত বিধানসভাৰ অধ্যক্ষ বিশ্বজিৎ দৈমাৰীয়ে বিধায়ক কেইগৰাকীক শপত বাক্য পাঠ কৰোৱায়৷
আজি শপত গ্ৰহণত ইউপিপিএলৰ প্ৰাৰ্থী দুগৰাকীয়ে বড়ো ভাষাত শপত লোৱাৰ বিপৰীতে বিজেপিৰ প্ৰাৰ্থী তিনিগৰাকীয়ে অসমীয়াতে শপত লয়।
শপতগ্রহণ অনুষ্ঠানত মুখ্যমন্ত্রী ড০ হিমন্ত বিশ্ব শর্মাকে ধৰি অসম চৰকাৰৰ মন্ত্রী আৰু বিধায়কসকলো উপস্থিত থাকে৷
সদ্যসমাপ্ত উপ–নির্বাচনৰ ফলাফলৰ পাছত বর্তমানৰ ১২৫জনীয়া অসম বিধানসভাত বিজেপিৰ আসনৰ সংখ্যা ৫৯ৰ পৰা ৬২খনলৈ বৃদ্ধি পালে৷
সেইদৰে বিজেপিৰ মিত্রদল ইউপিপিএলৰ আসনৰ সংখ্যা ৬খনৰ পৰা ৭খনলৈ বৃদ্ধি পালে৷
আনহাতে, কংগ্রেছৰ আসনৰ সংখ্যা ২৯খনৰ পৰা ২৭খনলৈ আৰু এ আই ইউ ডি এফৰ আসনৰ সংখ্যা ১৫খনলৈ হ্রাস পালে৷
সেইদৰে, সদনৰ মজিয়াত বিজেপি মিত্রজোঁটৰ শক্তি ৭৮গৰাকীলৈ বৃদ্ধি পালে৷
বর্তমান অসম বিধানসভাত বিভিন্ন দলৰ স্থিতি হ’ল এনেধৰণৰ– বিজেপি ৬২, কংগ্রেছ ২৭, এ আই ইউ ডি এফ ১৫, অগপ ৯, ইউপিপিএল ৭, বি পি এফ ৩, চি পি আই (এম) ১ আৰু নির্দলীয় (ৰাইজৰ দল) ১৷
