২৫ নৱেম্বৰ পৰা আৰম্ভ হ’বলগীয়া নিউজিলেণ্ডৰ বিৰুদ্ধে ঘৰুৱা টেষ্ট শৃংখলাৰ বাবে আজি ভাৰতীয় দল ঘোষণা কৰা হৈছে। শৃংখলাটোৰ বাবে ঘোষিত ভাৰতীয় দলটোত নাথাকিব কেইবাজনো ছিনিয়ৰ ক্ৰিকেটাৰ।
নিয়মীয়া অধিনায়ক বিৰাট কোহলীৰ লগতে ৰোহিত শৰ্মা, যশপ্ৰীত বুমৰাহ, ঋষভ পন্ত, মহম্মদ ছামী আৰু শাৰ্দুল ঠাকুৰক দুখন টেষ্টৰ শৃংখলাটোত বিশ্ৰাম দিয়া হৈছে।
অৱশ্যে বিৰাট কোহলীয়ে প্ৰথম টেষ্টৰ পিছত দ্বিতীয় টেষ্টৰ বাবে ভাৰতীয় দলত যোগদান কৰিছে ভাৰতীয় ক্ৰিকেট নিয়ন্ত্ৰণ ব’ৰ্ডে।
বিৰাট কোহলীৰ অনুপস্থিতিত সহ-অধিনায়ক আজিংক্য ৰাহানেই ২৫ ৰ পৰা ২৯ নৱেম্বৰলৈ কানপুৰৰ গ্ৰীণ পাৰ্কত অনুষ্ঠিত হ’বলগীয়া প্ৰথমখন টেষ্টত ভাৰতীয় দলটোক নেতৃত্ব দিব।
আইচিচি টি-২০ বিশ্বকাপৰ শেষত ভাৰতৰ টি-২০ অধিনায়কত্বৰ পৰা পদত্যাগ কৰা আৰু নিউজিলেণ্ডৰ বিৰুদ্ধে তিনিখন খেলৰ টি-২০ শৃংখলাত বিশ্ৰাম লোৱা বিৰাট কোহলী দ্বিতীয় টেষ্টৰ বাবে দললৈ উভতি আহিব আৰু ৩ ডিচেম্বৰৰ পৰা মুম্বাইৰ ৱাংখেডে ষ্টেডিয়ামত অনুষ্ঠিত হ’বলগীয়া দ্বিতীয় খন টেষ্টত টীম ইণ্ডিয়াক নেতৃত্ব দিব।
“সৰ্ব ভাৰতীয় ছিনিয়ৰ চিলেকচন কমিটিয়ে নিউজিলেণ্ডৰ বিৰুদ্ধে আগন্তুক দুখনীয়া টেষ্ট শৃংখলাৰ বাবে দল ঘোষণা কৰিছে। বিৰাট কোহলীয়ে দ্বিতীয় টেষ্টৰ বাবে দলত যোগদান কৰিব আৰু দলটোক নেতৃত্ব দিব।” ভাৰতীয় ক্ৰিকেট নিয়ন্ত্ৰণ ব’ৰ্ডে এক বিজ্ঞপ্তিত কয়।
#TeamIndia squad for NZ Tests:
A Rahane (C), C Pujara (VC), KL Rahul, M Agarwal, S Gill, S Iyer, W Saha (WK), KS Bharat (WK), R Jadeja, R Ashwin, A Patel, J Yadav, I Sharma, U Yadav, Md Siraj, P Krishna
*Virat Kohli will join the squad for the 2nd Test and will lead the team. pic.twitter.com/FqU7xdHpjQ
— BCCI (@BCCI) November 12, 2021
IPL-ৰ দ্বিতীয় পৰ্বত ৰয়েল চেলেঞ্জাৰ্চ বাঙ্গালোৰৰ হৈ সুন্দৰ প্ৰদৰ্শন কৰা উইকেট ৰক্ষক বেটাৰ কে এছ ভাৰতক অন্তৰ্ভুক্ত কৰা হৈছে। অৱশ্যে দলৰ প্ৰথম পচন্দৰ উইকেট ৰক্ষক বেটাৰ হিচাপে ঋদ্ধিমান সাহাই অগ্ৰাধিকাৰ পাব পাৰে। আনকেপড পেচাৰ প্ৰসিধ কৃষ্ণা আৰু মিডল অৰ্ডাৰ বেটাৰ শ্ৰেয়স আয়াৰে টেষ্ট অভিষেক কৰাৰ সুযোগ পাব পাৰে।
জুলাইৰ বিশ্ব টেষ্ট চেম্পিয়নশ্বিপৰ ফাইনেলত নিউজিলেণ্ডৰ বিৰুদ্ধে পৰাস্ত হোৱাৰ পাছত দলটোৰ বিৰুদ্ধে ভাৰতৰ এইটো প্ৰথমটো টেষ্ট শৃংখলা হ’ব।
ঘোষিত ভাৰত দলঃ আজিংক্য ৰাহানে (অধিনায়ক), কে এল ৰাহুল, মায়াংক আগৰৱাল, চেতেশ্বৰ পুজাৰা (সহ-অধিনায়ক), শুভমন গিল, শ্ৰেয়স আয়াৰ, ঋদ্ধিমান সাহা (উইকেটকিপাৰ), কে এছ ভৰত (উইকেটকিপাৰ), ৰবীন্দ্ৰ জাদেজা, ৰবিচন্দ্ৰন অশ্বিন, অক্সাৰ পেটেল, জয়ন্ত যাদৱ, ইশান্ত শৰ্মা, উমেশ যাদৱ, মহম্মদ চিৰাজ, প্ৰসিধ কৃষ্ণা
