দেশৰ সংবিধানে প্ৰদান কৰা সমতাৰ অধিকাৰক উপহাস কৰি তথাকথিত উচ্চবৰ্ণৰ লোকৰ দ্বাৰা নিষ্পেষিত হৈ আহিছে নিম্ন বৰ্ণৰ লোকসকল। স্বাধীনতাৰ ৭৫ বছৰ পিছতো দেশত সমতাৰ অধিকাৰ বাস্তৱত ধোঁৱাচাঙত।
এই সমতাৰ অধিকাৰকে আকৌ এবাৰ বুঢ়া আঙুলি দেখুৱাই ৰাজস্থানৰ এচাম তথাকথিত উচ্চবৰ্ণৰ লোকে দলিত সমাজক লাঞ্ছনা কৰিছে।
বৃহস্পতিবাৰে সন্ধিয়া ৰাজস্থানৰ জয়পুৰ জিলাৰ এখন গাঁৱত ঘোঁৰা চলাই বিবাহ সমদলত ভাগ লোৱাৰ বাবেই দলিত ব্যক্তি এজনৰ বৰযাত্ৰীৰ ওপৰত এদল লোকে শিল নিক্ষেপ কৰে।
বৰযাত্ৰী দলৰ সৈতে আৰক্ষীৰ এটা দল উপস্থিত থকা স্বত্বেও এই ঘটনা সংঘটিত হৈছে। জয়পুৰ জিলাৰ কাইৰোদি গাঁৱত সংঘটিত এই ঘটনাত ১২ জন লোক আঘাতপ্ৰাপ্ত হয়।
কইনা গৰাকীৰ পিতৃ হৰিপাল বালাই জানিবলৈ দিয়ে যে ৰাজপুত সম্প্ৰদায়ৰ এদল লোকে তেওঁলোকৰ ওপৰত হঠাতে এই আক্ৰমণ কৰে। দলিত সম্প্ৰদায়টোৱে বিবাহত ঘোঁৰা ব্যৱহাৰ কৰিলে আক্ৰমণৰ সমুখীন হোৱাৰ আশংকাত বালাই বিয়াখনৰ বাবে আৰক্ষীৰ সুৰক্ষা বিচাৰিছিল।
তেওঁ অভিযোগ কৰিছিল যে ৰাজপুত সম্প্ৰদায়ৰ লোকসকলে প্ৰায়ে কৈছিল যে তেওঁলোকে দলিতসকলক ঘোঁৰা চলাবলৈ নিদিয়ে।
বালাই কয়, “আমাৰ গাঁৱত দলিতসকলে বিবাহৰ শোভাযাত্ৰাৰ সময়ত ঘোঁৰা চলোৱাটো সচৰাচৰ নহয়। মই বৈষম্যৰ এই পৰম্পৰা ভাঙিব বিচাৰিছিলো।”
আৰক্ষীয়ে গোচৰটোত ১০ জন লোকক গ্ৰেপ্তাৰ কৰিছে, আৰু আন ১০ জনৰ অনুসন্ধান কৰি আছে। সংবাদ সংস্থা ইণ্ডিয়ান এক্সপ্ৰেছৰ এক প্ৰতিবেদন অনুসৰি, আইপিচি ধাৰা ৩২৩ (স্বেচ্ছাই আঘাত কৰাৰ বাবে শাস্তি), ৩৪১ (অন্যায়ভাৱে সংযম ৰখাৰ বাবে শাস্তি) আৰু অনুসূচীত জাতি/জনজাতি (অত্যাচাৰ প্ৰতিৰোধ) আইনৰ ধাৰাৰ অধীনত এখন এজাহাৰ পঞ্জীয়ন কৰা হৈছে।
