অসমীয়া চলচ্চিত্ৰ উদ্যোগত সংযোজিত হ’ল আৰু এখন মননশীল ছবি। আজি অসমৰ কেইবাটাও চিত্ৰগৃহত মুক্তি পাব দীপ চৌধুৰী পৰিচালিত বহু প্ৰতীক্ষিত ছবি আলিফা।
যোৱা ৩০ মাৰ্চত কলকাতাত মুক্তি পোৱাৰ পিছত দৰ্শকৰ পৰা অভূতপূৰ্ব সঁহাৰি পোৱা আলিফাই অসমতো যথেষ্ট সমাদৰ লাভ কৰিব বুলি আশা কৰিছে প্ৰযোজক গোষ্ঠীয়ে।
অসমীয়া চলচ্চিত্ৰ জগতত নতুন সংযোজন এই চলচ্চিত্ৰখনৰ ব্যতিক্ৰমী দিশটো হ’ল ইয়াৰ বিষয়বস্তুৰ লগতে শিল্পীসকলৰ অভিনয়। জীৱনৰ আশা, বিষাদ আৰু সংঘাত সকলোখিনিয়ে ছবিখনত নান্দনিকতাৰে স্থান পাইছে।
চলচ্চিত্ৰখন চিত্ৰ সমালোচকৰ বাবে যেনেকৈ এখন নতুন মাত্ৰাৰ ছবি, একেদৰে সাধাৰণ দৰ্শকৰ বাবেও ই এখন উপভোগ্য ছবি।
কলকাতাত মুক্তি পোৱাৰ পিছত প্ৰসিদ্ধ ছবি নিৰ্মাতা অনিন্দিতা সৰ্বাধিকাৰীয়ে আলিফাক এখন পেইন্টিঙৰ সৈতে ৰিজাই সৰ্বাংগসুন্দৰ ছবি বুলি অভিহিত কৰিছে।
কলকাতাৰ দৰ্শকে ছবিখনত অভিনয় কৰা শিল্পীসকলৰ অভিনয়ক ভূয়সী প্ৰশংসা কৰিছে। ছবিখনৰ মূখ্য ভূমিকাত অভিনয় কৰা অভিনেত্ৰী জয়া শীল ঘোষ আৰু অভিনেতা বাহাৰুল ইছলামৰ অভিনয়ে মুগ্ধ কৰিছে ৰুচিশীল দৰ্শকসকলক।
আলিফা চলচ্চিত্ৰখনত গান মাথোঁ এটাই আছে। বিক্ৰম ঘোষৰ আবহ সংগীতে ছবিখনক বিশেষ মাত্ৰা প্ৰদান কৰিছে।
পৰিচালক দীপ চৌধুৰীৰ পৰিচালনাৰ দিশটোও শলাগিবলগীয়া। ছবিখনৰ শিল্পীসকলেও পৰিচালকগৰাকীৰ কামৰ প্ৰতি থকা প্ৰগাঢ় নিষ্ঠাৰ কথা সুঁৱৰি কৃতজ্ঞতা প্ৰকাশ কৰিছে।
কলকাতাৰ সমান্তৰালভাৱে অসমতো ছবিখনে ৩০ মাৰ্চত মুক্তি পোৱাৰ কথা আছিল যদিও ‘বিশেষ কাৰণ’ত অসমত মুক্তিৰ দিন ৬ এপ্ৰিললৈকে স্থগিত ৰাখিবলগীয়া হৈছিল।
আজি আলিফা অসমৰ ছয়টা চিত্ৰগৃহত মুক্তি পাব। গুৱাহাটীৰ অনুৰাধা চিনেমাৰ লগতে পল্টনবজাৰৰ গ’ল্ড এ এছ টি চিত, বৰপেটাৰ ইন্দ্ৰপুৰী চিনেমা, ধুবুৰীৰ বিষ্ণু টকীজ, খাৰুপেটীয়াৰ শ্ৰীগণেশ টকীজ আৰু গোৱালপাৰাৰ কল্পনা চিনেমাত ছবিখন মুক্তি পাব।
উল্লেখযোগ্য যে সচৰাচৰ অসমীয়া ছবিৰ প্ৰিমিয়াৰৰ দিনটোত ছবিখনৰ লগত জড়িত লোকসকলে গুৱাহাটীত দৰ্শকৰ সৈতে ভাৱ-বিনিময় কৰাৰ পৰম্পৰাৰ বিপৰীতে প্ৰথমবাৰৰ বাবে আলিফাৰ পৰিয়ালে আজি বৰপেটাত প্ৰথমটো দৰ্শনীৰ পিছতে দৰ্শকৰ সৈতে ভাৱ-বিনিময় কৰিব।
চলচ্চিত্ৰখনৰ প্ৰযোজক গোষ্ঠীয়ে অসমৰ চলচ্চিত্ৰপ্ৰেমী ৰাইজে ছবিখন উপভোগ কৰাৰ লগতে ৰাজ্যখনত ভাল ছবি নিৰ্মাণত উৎসাহ যোগাব বুলি আশা ব্যক্ত কৰিছে।
