ক’ভিদ-19 টিকাকৰণ নিয়ম অনুসৰণ নকৰিলে দৰমহা হেৰুওৱাৰ লগতে চাকৰিৰ পৰা বহিষ্কৃত হ’ব গুগলৰ কৰ্মচাৰী। গুগলৰ আভ্যন্তৰীণ নথিপত্ৰৰ উদ্ধৃতি দি সংবাদ সংস্থা CNBC এ প্ৰকাশ কৰা প্ৰতিবেদনে এই কথা সদৰী কৰিছে।
গুগলৰ নেতৃত্বৰ দ্বাৰা প্ৰচাৰিত এক পত্ৰত কোৱা হৈছে যে কৰ্মচাৰীসকলে তেওঁলোকৰ টিকাকৰণৰ স্থিতি ঘোষণা কৰিবলৈ আৰু প্ৰমাণ দেখুওৱা নথিপত্ৰ আপলোড কৰিবলৈ বা চিকিৎসা বা ধৰ্মীয় ৰেহাইৰ বাবে আবেদন কৰিবলৈ ৩ ডিচেম্বৰলৈকে সময় আছিল।
সেই তাৰিখৰ পিছত গুগলে কৈছিল যে স্থিতি আপলোড নকৰা বা টিকাকৰণ নকৰা কৰ্মচাৰীসকলৰ সৈতে যোগাযোগ কৰা আৰম্ভ কৰিব আৰু যিসকলৰ ৰেহাইৰ অনুৰোধ অনুমোদিত হোৱা নাছিল তেওঁলোকৰ বিৰুদ্ধে শাস্তিমূলক ব্যৱস্থা ল’ব।
CNBC -এ জনোৱা অনুসৰি ১৮ জানুৱাৰীৰ ভিতৰত টিকাকৰণৰ নিয়ম পালন নকৰা কৰ্মচাৰীসকলক ৩০ দিনৰ বাবে সবেতন প্ৰশাসনিক ছুটিত ৰখা হ’ব। তাৰ পিছত ছয় মাহলৈকে অবৈতনিক ব্যক্তিগত ছুটি আৰু অন্তিম পৰ্যায়ত নিলম্বন কৰা হ’ব।
এই মাহৰ আৰম্ভণিতে গুগলে অ’মিক্ৰন প্ৰকাৰৰ আশংকা আৰু কোম্পানী-নিৰ্দেশিত টিকাকৰণৰ প্ৰতি ইয়াৰ কৰ্মচাৰীসকলৰ কিছু প্ৰতিৰোধৰ মাজত কাৰ্যালয়লৈ ঘূৰি অহাৰ পৰিকল্পনা অনিৰ্দিষ্ট কাললৈ বিলম্বিত কৰিছিল।