যোৱা দুদিনমানৰ পৰা আমছুৰ এজন দ্বিতীয় শ্ৰেণীৰ নেতাৰ এটি ভিডিঅ’ বৰকৈ ভাইৰেল হৈছে আৰু এই ভিডিঅ’ৰ বক্তৱ্যত দেশী জনগোষ্ঠীয় মঞ্চ, অসমে প্ৰতিক্ৰিয়া প্ৰকাশ কৰিছে।
দেশী জনগোষ্ঠীয় মঞ্চ, অসমে এক বিবৃতিত কয়—উল্লেখিত ভিডিঅ’টোত আমছুৱে অসমৰ ডেৰ কোটি মুছলমানক লৈ আছুৰ বিকল্প আন্দোলন আৰম্ভ কৰাৰ কথা বাৰে বাৰে দোহাৰিছে।
আমছুৱে আন্দোলন কৰক, পাহাৰ কাটি নদী বোৱাই লওক, দিল্লী – দিশপুৰ উত্তাল কৰক, তাত আমাৰ কব লগা একো নাই। আমাৰ ক’ব লগা কথাটো হল বাৰে বাৰে আমাক সাঙুৰি লৈ কিয় আমছুৱে বক্তৱ্য দিয়ে? পশ্চিম অসমত বসবাস কৰা ১৪ লাখ ৩৩ হেজাৰ দেশী জনগোষ্ঠীৰ মানুহ আগতেও আমছুৰ লগত নাছিল, এতিয়াও নাই আৰু ভৱিষ্যতেও নাথাকিব। ১৯৮০ চনৰ মাৰ্চ মাহত আমাৰ ঘৰৰ কাষৰ জলেশ্বৰ হাইস্কুলত অধিৱেশন কৰি আমছুৰ জন্ম হৈছিল।
জিঞ্জিৰাম নদীৰ ইপাৰ আৰু সিপাৰ। আমি তেতিয়া প্ৰৱেশিকা পৰীক্ষা দিবলগীয়া ছাত্ৰ। আমি সেই সময়তো দেখিছো আমাৰ অঞ্চলৰ এজনো দেশী যুৱক ভুলতো আমছুৰ অধিৱেশন লৈ যোৱা নাই।
আমছুৰ চাৰি দশক সম্পূৰ্ণ হোৱাৰ পিছতো দেখিছো দেশী সকল আমছুৰ লগত নাই। ক’ৰবাত দুই এজনে জীৱন- জীৱিকা হিচাবে লৈ আমছুৰ লগত থাকিব পাৰে। গতিকে আমি দেশী জনগোষ্ঠীয় মঞ্চ, অসমে আমছুৰ সেইদিনা বক্তৱ্য দিয়া নেতা গৰাকীক কব বিচাৰো যে আপোনালোকে যি কৰে কৰক মাথোন আমাক লগত সাঙুৰি নলব।
দেশীসকলৰ বিষয়ে চিন্তা কৰিবলৈ তেওলোকৰ জাতীয় সংগঠন আছে, যুৱ ছাত্ৰ সংগঠন আছে, বৌদ্ধিক সমাজ আছে, তেওঁলোকে যি পথ দেখুৱায়, দেশী সকল সেই পথেৰে আগবাঢ়িব। আগৰ দৰে খালৈত ভৰাই লৈ দিশপুৰত বিক্ৰী কৰাৰ কৌশল কৰি লাভ নাই। আমি সকিয়াই নিদিও, পুনৰ দোহাৰিছো, দেশী সকলক বাৰে বাৰে মাজলৈ টানি আনি কলংকিত নকৰিব।
মুছলমান মুছলমান ভাই ভাই, সেই সূত্ৰত দেশী সকল নাই। হিন্দু- মুছলমান খিলঞ্জীয়া , এক হওঁক সকলো অসমীয়া।
এইদৰে আজি সংবাদ মাধ্যমক অৱগত কৰে দেশী জনগোষ্ঠীয় মঞ্চ অসমৰ সভাপতি শ্বেখ হেদায়েতুল্লাহই।
