এখন আগশাৰীৰ দৈনিক বাতৰি কাকত আৰু অপ্ৰকাশিত এটা বিশেষ লেখা।
লেখাৰ নাম ‘বিধানসভাৰ আলেখ লেখ’।
লেখাটো আছিল বুদ্ধিজীৱী ড০ হীৰেন গোহাঁইৰ।
য’ত স্থান পাইছিল মুখ্যমন্ত্ৰীৰ ভূমি কেলেংকাৰীৰ প্ৰসংগও।
কিন্তু এই লেখাটো প্ৰেৰণ কৰাৰ পাছতে অসমৰ এখন বিশেষ কাকতৰ পৰাই ভৱিষ্যত সময়ত ‘নিষিদ্ধ’ হিচাপে বিবেচিত হ’ল অতদিনে বাতৰি কাকতখনত বিশেষ লেখা লিখি অহা ড০ হীৰেণ গোহাঁই।
কি আছিল অপ্ৰকাশিত সেই বিশেষ লেখাত?
তাৰ বাবে আমি যাব লাগিব লেখক পৰেশ মালাকাৰৰ এটা ফেইচবুক পোষ্টলৈ।
তেওঁ পোষ্টটোৰ জৰিয়তে প্ৰকাশ কৰিছে অপ্ৰকাশিত বিশেষ লিখাটো।
পোষ্টটোত লিখা অনুসৰি “বিধান সভাৰ আলেখ-লেখ।
লোকসভাৰ বৰ্তমান ৰেহ-ৰূপ অনুকৰণ কৰি শাসক দলৰ বিধায়কে অসমৰ বিধান সভাতো সমুচিত আলোচনা আৰু বিতৰ্ক বন্ধ কৰাৰ অপচেষ্টা কৰা দেখা যায়। বিৰোধী বিধায়কে চৰকাৰক অসুবিধাত পেলোৱা মন্তব্য বা প্ৰশ্ণ কৰিলেই শাসক দলৰ বিধায়ক মিলি হুলস্থূল লগাই তেওঁক কথা কোৱাৰ পৰা বিৰত কৰে।বিধান সভা শৃঙ্খলাহীন জনসভা নহয়।
বিধায়কৰ কথা মনোযোগেৰে শুনি সেই বিষয়ৰ মন্ত্ৰীয়ে চৰকাৰৰ পক্ষৰ উত্তৰ দিয়া উচিত। আমি ছাত্ৰাৱস্থাত লোকসভাৰ অধিবেশন গেলাৰিৰ দৰ্শক হৈ দেখিছিলো।প্ৰধান মন্ত্ৰী নেহৰুক বিখ্যাত বিৰোধী নেতা আচাৰ্য কৃপালনি,কামাথ আদিয়ে অতি তীব্ৰ,তিক্ত ভাষাত সমালোচনা কৰিছিল।
নেহৰু আদি কংগ্ৰেছী মন্ত্ৰীয়ে নীৰৱে,ধৈৰ্যৰে শুনি যথাযথ সমিধান দিছিল।আজি তেওঁলোকক একনায়কত্ববাদী ক্ষমতালোভী বুলি বদনাম ৰটি বিজেপিয়ে কেনে গণতন্ত্ৰৰ উদাহৰণ দাঙি ধৰিছে এয়া তাৰ প্ৰমাণ। আনহাতে শাসক দলে অতি আপত্তিজনক আৰু উত্তেজক মন্তব্য কৰিলে বিৰোধী যদি সৰৱ হৈ উঠে, তেতিয়া তেওঁলোককহে শৃঙ্খলাভঙ্গৰ অভিযোগত অভিযুক্ত কৰা হয়।
এই প্ৰসঙ্গতে সম্প্ৰতি আলোচনাৰ পৰা অদৃশ্য হৈ পৰা এটা সাঙ্ঘাতিক কথা উল্লেখ কৰোঁ।মুখ্যমন্ত্ৰীৰ পৰিয়ালৰ ভূমি-কেলেঙ্কাৰীৰ যথাযথ তদন্তৰ দাবী তথাকথিত তথ্যৰ অভাৱৰ বাবে বাতিল কৰা অতি অবৈধ,অসাঙ্বিধানিক কথা হৈছে।কাৰণ The Wire আৰু Cross-currentsত প্ৰত্যয়জনক প্ৰাথমিক তথ্য দাঙি ধৰা হৈছে।তদন্ত আৰম্ভ কৰিবলৈ
সেয়ে যথেষ্ট।
সেই সময়ত কেলেঙ্কাৰীটো সম্ভৱ কৰিব পৰা ৰাজনৈতিক ক্ষমতাৰ অধিকাৰী আছিল বৰ্তমানৰ মুখ্যমন্ত্ৰীজন।আৰু বেছি লিখাৰ প্ৰয়োজন আছেনে?
কোনো ৰাজ্যৰ মুখ্যমন্ত্ৰীৰ বিষয়ে এনে অভিযোগ থকা ভয়ঙ্কৰ কথা।তুৰন্তে উচ্চ পৰ্যায়ৰ তদন্ত হ’ব
লাগে উচ্চ ন্যায়ালয়ৰ তদাৰকীত। সেই সময়ত তেওঁ পদৰ পৰা আঁতৰি থাকিব লাগিব।”
ইপিনে, এই বিশেষ লেখা ৮৩ বছৰ ধৰি জাতিৰ সেৱাৰ নামত উসৰ্গিত এখন বিশেষ বাতৰি কাকতত প্ৰকাশ নোপোৱাত এতিয়া দুখ প্ৰকাশ কৰিছে বিশিষ্ট বুদ্ধিজীৱী ড০ হীৰেণ গোহাঁইয়ে। আমাৰ আগত তেওঁ টেলিফোনিক বাৰ্তালাপত কি ক’লে সেয়া ভিডিওটোত লাভ কৰিব।
ইপিনে, গণতন্ত্ৰৰ চতুৰ্থ স্তম্ভৰ কুঠাৰাঘাট ভয়ংকৰ ভৱিষ্যতৰ ইংগিত বুলি দাবী কৰে ৰাইজৰ দলৰ উপ সভাপতি ৰাছেল হুছেইনে। গণতান্ত্ৰিক কন্ঠ মষিমূৰ কৰিবলৈ চৰকাৰখনে ষড়যন্ত্ৰ চলাইছে বুলি দাবী হুছেইনৰ।
আনহাতে, গণতন্ত্ৰৰ চতুৰ্থ স্তম্ভই যেতিয়া অতি নিৰ্লজ্জভাৱে শাসকীয় পক্ষৰ ওচৰত আত্ম সমৰ্পন কৰে তেতিয়া গণতন্ত্ৰৰ অৱশিষ্ঠ ধ্বংস হৈ পৰে বুলি দাবী জাতীয়তাবাদ পুনৰ নিৰ্মাণ সমিতিৰ সাধাৰণ সম্পাদক ৰাজকুমাৰ বৈশ্যৰ।
নিশ্চয়কৈ, এয়াই ভবাৰ সময়। গণতন্ত্ৰৰ চতুৰ্থ স্তম্ভৰ শেহতীয়াকৈ যি দশা পোহৰলৈ আহিছে সেয়া কিন্তু পূৰ্বতে বিৰল আছিল সেয়া সকলোৰে অনুমেয়।
ইপিনে ‘দৈনিক অসম’ কৰ্তৃপক্ষৰ সৈতে যোগাযোগ কৰাত তেওঁলোকে এই বিষয়ত কোনো মন্তব্য কৰিবলৈ অস্বীকাৰ কৰি মাথো কয় ‘ন’ কমেণ্ট’।
