ছৌদি আৰৱৰ এগৰাকী ৰাজকুমাৰী আৰু তেওঁৰ কন্যাক কাৰাগাৰৰ পৰা মুকলি কৰি দিয়া হৈছে। দেশখনৰ ৰাজধানী ৰিয়াধত দুয়োগৰাকীক তিনি বছৰ ধৰি বিনা অভিযোগত বন্দী কৰি ৰখা হৈছিল।
শনিবাৰে এটা মানৱ অধিকাৰ সংস্থাই এই খৱৰ সদৰী কৰে। ৰাজ পৰিয়ালৰ সদস্য ৫৭বছৰীয়া বাছমাহ বিন্ট ছাউডক ২০১৯ চনৰ মাৰ্চ মাহত কাৰাগাৰলৈ প্ৰেৰণ কৰা হৈছিল।
সেই সময়ত ৰাজকুমাৰীগৰাকীয়ে চিকিৎসাৰ বাবে ছুইজাৰলেণ্ডলৈ যোৱাৰ প্ৰাক্ মুহূৰ্ততে তেওঁক গ্ৰেপ্তাৰ কৰা হৈছিল।
লগতে পঢ়ক: পাকিস্তানত প্রচণ্ড তুষাৰপাতত আৱদ্ধ প্ৰায় ১হাজাৰ গাড়ী; ঠাণ্ডাত শিশুকে ধৰি ২২জন পৰ্যটকৰ মৃত্যু
যোৱা ২০২০ চনত বিন্ট ছাউডে ৰজা ছলমান আৰু ৰাজকুমাৰ মহম্মদ ছলমানক স্বাস্থ্যৰ অৱনতি ঘটাৰ বাবে মুকলি কৰি দিবলৈ অনুৰোধ জনাইছিল।
এক টুইটাৰত ALQST ফৰ হিউমেন ৰাইটছে কয়, ‘বাছমাহ বিন্ট ছাউড আৰু তেওঁৰ কন্যা ছুহৌডক মুকলি কৰি দিয়া হৈছে।‘
মানৱ অধিকাৰ সংস্থাটোৱে কয়,’ স্বাস্থ্য ভাঙি পৰাৰ পাছতো তেওঁক জৰুৰী চিকিৎসাৰ ব্যৱস্থা কৰা হোৱা নাছিল। কাৰাগাৰত থকাৰ সময়ছোৱাত কোনো সময়তে তেওঁৰ বিৰুদ্ধে কোনো অভিযোগ অনা হোৱা নাই।‘
লগতে পঢ়ক:‘বুল্লি বাই’ এপৰ মূল অভিযুক্ত অসমৰ নীৰজ বিষ্ণইয়ে দিল্লী আৰক্ষীক দিলে আত্মহত্যাৰ ভাবুকি
ইপিনে, ছৌদি প্ৰশাসনৰ কোনো বিষয়াই এই সন্দৰ্ভত এতিয়ালৈকে মুখ খোলা নাই।
বাতৰি অনুসৰি, পূৰ্বেও ছৌদি আৰৱত ৰাজ পৰিয়ালৰ কেইবাগৰাকীও লোকক জিম্মাত লোৱা হৈছে যাৰ ভিতৰত কেইবাগৰাকীকো কোনো অভিযোগ অবিহনেই গ্ৰেপ্তাৰ কৰা হয়।
