এটাৰ পাছত আন এটাকৈ সফলতা লাভ কৰিছে হাজো আৰক্ষীয়ে। শেহতীয়াকৈ কিছুদিন ধৰি অপৰাধীৰ বিৰুদ্ধে কেইবাটাও সফল অভিযান চলাবলৈ সক্ষম হৈছে হাজো আৰক্ষী।
এইবাৰ হাজো আৰক্ষীৰ জালত পৰিছে এটা বাইক চোৰৰ গেং। হাজো আৰক্ষীয়ে এক গোপন সূত্ৰৰ পম খেদি হাজোৰ বুল্লুটত এটা অভিযান চলায়।
অভিযান কালত বুল্লুটৰ এটা ডেম্পত এ এছ-০১ ডি কে ৯১৪৮ নম্বৰৰ ৰয়েল এণ্ডভিল্ডৰ বাইক এখন টুকুৰা টুকুৰকৈ কাটি থকা অৱস্থাত ডেম্পৰ মালিক হাচান আলীক হাতেলোতে ধৰিবলৈ সক্ষম হয়।
পিছত হাচান আলীৰ স্বীকাৰোক্তিৰ ভিত্তিত হাজোৰ খোপনিকুছিৰ পৰা আজহাৰ আলী আৰু দক্ষিণ শিংৰাৰ পৰা চাইফুদ্দিন আহমেদক আটক কৰে আৰক্ষীয়ে।
এই দুধৰ্ষ চোৰ কেইটাৰ ভাষ্যৰ ভিত্তিত হাজো আৰক্ষীয়ে মহানগৰীৰ পাঠৰকুঁৱৰীৰ পৰা বাবুল আলী, গুৱাহাটী সোনাপুৰৰ পৰা বিটু বৰ্মন, দিশপুৰৰ পৰা দ্বীপ কলিতা আৰু লখৰাৰ লালুং গাঁৱৰ পৰা এই চোৰৰ গেঙৰ মাষ্টাৰ মাইণ্ড জিতু বড়োক আটক কৰিবলৈ সক্ষম হৈছে।
লগতে আৰক্ষীয়ে জব্দ কৰিছে দুখন চুৰি পালচাৰ বাইক। দীৰ্ঘদিনৰ পৰা অসমৰ বিভিন্ন প্ৰান্তত ৭ জনীয়া এই কুখ্যাত চোৰৰ গেঙে বাইক চুৰিৰে সন্ত্ৰাসৰ সৃষ্টি কৰি আহিছিল।
ইতিমধ্যে হাজো আৰক্ষীয়ে অধিক তথ্য উদঘাটনৰ বাবে চোৰকেইটাক সোধাপোছা অব্যাহত ৰাখিছে।
