ৰাছিয়া-ইউক্ৰেইন যুদ্ধ সন্দৰ্ভত প্ৰথম অৱস্থাৰ পৰাই নিৰপেক্ষ স্থিতি অৱলম্বন কৰি আহিছে ভাৰতে। ৰাষ্ট্ৰসংঘত এই বিষয়ত ভোটদানৰ পৰাও বিৰত আছে ভাৰত। ভাৰতৰ এই স্থিতিৰ বাবে বিশ্ব সম্প্ৰদায়ৰ গৰিহণাৰো সন্মুখীন হৈছে।
এনে সময়তে আন্তৰ্জাতিক ন্যায়ালয়ত ৰাছিয়াৰ বিপক্ষে ভোটদান কৰিছে এজন ভাৰতীয় ন্যায়াধীশে। আন্তৰ্জাতিক ন্যায়ালয়ত কালি ভাৰতৰ ন্যায়াধীশ দলবীৰ ভাণ্ডাৰীয়ে ৰাছিয়াৰ বিৰুদ্ধে ভোট দান কৰে।
ন্যায়াধীশ ভাণ্ডাৰীক ভাৰত চৰকাৰে আন্তৰ্জাতিক ন্যায়ালয়লৈ মনোনীত কৰিছিল।
অৱশ্যে ন্যায়াধীশ ভাণ্ডাৰীয়ে ৰাছিয়াৰ বিৰুদ্ধে ভোট দিছে যদিও এইয়া তেওঁৰ এক স্বতন্ত্ৰ পদক্ষেপ। ৰাছিয়া-ইউক্ৰেইন যুদ্ধৰ ক্ষেত্ৰত বিভিন্ন আন্তৰ্জাতিক মঞ্চত ভাৰতৰ পূৰ্বৰ স্থিতিয়ে বাহাল থাকিব।
ৰাষ্ট্ৰসংঘত ইউক্ৰেইন-ৰাছিয়া বিষয়ত ভোটদানৰ পৰা বিৰত থকা ভাৰতে দুয়োপক্ষক আলোচনাৰ ওপৰত গুৰুত্ব দি যুদ্ধ সমাপ্ত কৰিবলৈ আহ্বান জনাইছে।
আনহাতে ৰাষ্ট্ৰসংঘৰ শীৰ্ষ আদালতে বুধবাৰে ৰাছিয়াক ইউক্ৰেইন আক্ৰমণ স্থগিত ৰাখিবলৈ নিৰ্দেশ। ন্যায়ালয়ে কয় যে ইউক্ৰেইনৰ ওপৰত মস্কোৰ বল প্ৰয়োগৰ বাবে আন্তৰ্জাতিক ন্যায়ালয় গভীৰভাৱে চিন্তিত।
উল্লেখ্য যে ২৪ ফেব্ৰুৱাৰীত ৰাছিয়াৰ আক্ৰমণৰ কেইদিনমান পিছতে ইউক্ৰেইনে ৰাছিয়াৰ এই আক্ৰমণৰ বিৰুদ্ধে ৰাষ্ট্ৰসংঘৰ শীৰ্ষ আদালতত অভিযোগ উত্থাপন কৰিছিল।
