বঙাইগাঁও জিলা স্বাস্থ্য সমিতি আৰু এন টি ই পিৰ উদ্যোগত বঙাইগাঁও চহৰৰ নিকটৱৰ্তী দেউৰীপাৰাৰ নৰনাৰায়ণ খেল পথাৰত এদিনীয়া প্ৰীতিমূলক ক্ৰিকেট প্ৰতিযোগিতা অনুষ্ঠিত হয় ৷
দেশত যক্ষ্মা ৰোগ নিৰাময় কৰাৰ উদ্দেশ্য ‘টি বি হাৰেগা, দেশ জিতেগা’ শীৰ্ষক বাণীৰে এই প্ৰীতিমূলক ক্ৰিকেট প্ৰতিযোগিতা অনুষ্ঠিত হয় ৷
বঙাইগাঁও বিধান সভা সমষ্টিৰ বিধায়ক ফণীভূষণ চৌধুৰীয়ে বন্তি প্ৰজ্বলন আৰু ফিটা কাটি উদ্বোধন কৰা এই ক্ৰিকেট প্ৰতিযোগিতাখনত বৃহত্তৰ বঙাইগাঁও প্ৰেছ ক্লাৱ দল চূড়ান্ত বিজয়ী হয় ৷
প্ৰতিযোগিতাৰ চূড়ান্ত খেলখনত বৃহত্তৰ বঙাইগাঁও প্ৰেছ ক্লাবে কোকিলা প্ৰেছ ক্লাবক ২ ৰানৰ ব্যৱধানত পৰাজিত কৰে ৷ ৮ অভাৰৰ চূড়ান্ত খেলখনত প্ৰথমে বেটিং কৰি বঙাইগাঁও প্ৰেছ ক্লাবে ৩ টা উইকেট হেৰুৱাই ৯১ ৰান সংগ্ৰহ কৰে ৷
ইয়াৰ বিপৰীতে কোকিলা প্ৰেছ ক্লাবে ৮ অভাৰত ২ টা উইকেট হেৰুৱাই ৮৯ ৰান কৰিবলৈ সক্ষম হয় ৷ খেলৰ শেষত জিলা স্বাস্থ্য বিভাগৰ যুটীয়া স্বাস্থ্য সেৱা সঞ্চালক ডাঃ ভূপেন বৈশ্য, জিলা যক্ষ্মা বিষয়া ডাঃ হৰিদাস সৰকাৰ আদি উপস্থিত থাকি বিজয়ী আৰু বিজেতা দলক ট্ৰফী প্ৰদান কৰে ৷
আনহাতে বিজিত দলৰ ৰাজিবুল ইছলামে শ্ৰেষ্ঠ খেলুৱৈৰ বঁটা লাভ কৰে ৷ উল্লেখ্য যে প্ৰতিযোগিতাখনত অংশগ্ৰহণ কৰা আন দুটা দল হ’ল যক্ষ্মা বিজয়ী আৰু স্বাস্থ্য বিভাগ আৰু বঙাইগাঁও জিলা ক্ৰীড়া একাদশ ৷ বৃহত্তৰ বঙাইগাঁও প্ৰেছ ক্লাবে যক্ষ্মা বিজয়ী আৰু স্বাস্থ্য বিভাগৰ দলটোক পৰাজিত কৰি আৰু কোকিলা প্ৰেছ ক্লাবে জিলা ক্ৰীড়া বিষয়া একাদশক পৰাজিত কৰি চূড়ান্ত খেলখনত প্ৰৱেশ কৰিছিল ৷
