অভিযুক্তক এনকাউণ্টাৰ কৰি এতিয়া তদন্তৰ সন্মুখীন হ’বলগীয়া হৈছে বঙাইগাঁও আৰক্ষী। এই তদন্ত আকৌ কৰা হ’ব বঙাইগাঁও জিলাৰ আৰক্ষী অধীক্ষকৰ অনুৰোধমৰ্মেই।
গতিকে স্বাভাৱিকতে এতিয়া অভিযুক্তক এনকাউণ্টাৰ কৰাৰ বিষয়টোৱে নতুন মোৰ লোৱাৰ সম্ভাৱনা প্ৰকট হৈ পৰিছে।
বঙাইগাঁও সদৰ থানাৰ অন্তৰ্গত মাজগাঁৱত যোৱা ১৮ মাৰ্চৰ নিশা আৰক্ষীৰ জিম্মাৰ পৰা পলায়ন কৰিবলৈ চেষ্টা কৰাত কৰ্তব্যৰত আৰক্ষীয়ে মহম্মদ হুছেইন নামৰ এজন অভিযুক্তক গুলিয়াব লগা হৈছিল বুলি আৰক্ষীয়ে দাবী কৰিছিল ৷
ফলস্বৰূপে মহম্মদ হুছেইন সোঁভৰিত গুলীবিদ্ধ হৈ আহত হৈছিল। বঙাইগাঁও আৰক্ষী থানাত এই সন্দৰ্ভত ভাৰতীয় দণ্ডবিধিৰ ৩৫৩/৩৩৩/২২৪/৫১১ ধাৰাৰ অধীনত ১৫৭/২০২২ নম্বৰত গোচৰ এটা ৰুজু কৰা হৈছে ।
বঙাইগাঁও জিলাৰ আৰক্ষী অধীক্ষকৰ অনুৰোধমৰ্মে বঙাইগাঁও জিলাৰ জিলা দণ্ডাধীশ ডা:এম এছ লক্ষ্মী প্ৰিয়াই এক নিৰ্দেশনামৰ্মে বঙাইগাঁৱৰ সদৰ মহকুমাধিপতি জেনিফাৰ য়াচমিন চৌধুৰীক আৰক্ষীৰ দ্বাৰা অভিযুক্ত মহম্মদ হুছেইনক গুলিওৱা ঘটনাৰ তদন্ত কৰিবলৈ দায়িত্ব অৰ্পন কৰিছে।
মহকুমাধিপতি জেনিফাৰ য়াচমিন চৌধুৰীক উক্ত ঘটনাৰ তদন্ত কৰি ২৫ মাৰ্চৰ ভিতৰত প্ৰতিবেদন দাখিল কৰিবলৈ নিৰ্দেশনাটোত কোৱা হৈছে।
উল্লেখ্য যে মহম্মদ হুছেইক বঙাইগাঁও আৰক্ষীয়ে ড্ৰাগছসহ গ্ৰেপ্তাৰ কৰিছিল আৰু আৰক্ষীয়ে জানিবলৈ দিয়া মতে অভিযুক্ত মহম্মদ হুছেইন এজন ড্ৰাগছ ব্যৱসায়ী ৷
বহুতে প্রশ্ন কৰিছে এনকাউণ্টাৰৰ নামত আৰক্ষীয়ে নাটক ৰচিছিল নেকি? সকলো কথা স্পষ্ট হ’ব তদন্ত প্ৰতিবেদন প্ৰকাশৰ পিছত।
