আকাশমাৰ্গত এক ভয়ংকৰ অঘটন।
আমেৰিকা যুক্তৰাষ্ট্ৰত এগৰাকী ৩৫ বছৰীয়া স্কাইডাইভাৰ আকাশৰ ১৩,৫০০ ফুট উচ্চতাৰ পৰা দুৰ্ঘটনাবশতঃ তললৈ সৰি পৰিল।
ঘণ্টাত দুশ কিলোমিটাৰ গতিবেগেৰে তললৈ সৰি পৰা স্কাইডাইভাৰ গৰাকীৰ অৱশ্যে ইমান ভয়ংকৰ দুৰ্ঘটনাৰ পিছতো সৌভাগ্যক্ৰমে প্ৰাণ ৰক্ষা পৰিছে।
আমেৰিকাৰ জৰ্ডান হেটমেকাৰ নামৰ মহিলা স্কাইডাইভাৰ গৰাকীয়ে ১৩,৫০০ ফুট উচ্চতাত এখন বিমানৰ পৰা জঁপিয়াইছিল।
কিন্তু তেওঁৰ পেৰাচুট খোল খোৱাৰ পিছতে পেৰাচুটটো তেওঁৰ ভৰিত লাগি ধৰে।
ফলত স্কাইডাইভাৰ গৰাকীয়ে প্ৰচণ্ড জোৰেৰে তললৈ সৰি পৰে। মাটিত খুব জোৰেৰে আহি আচাৰ খাই পৰাৰ পিছতো স্কাইডাইভাৰ গৰাকীৰ মৃত্যু ঘটা নাই।
গুৰুতৰ ভাবে আহত স্কাইডাইভাৰ গৰাকীক বৰ্তমান চিকিৎসাধীন কৰোৱা হৈছে। চিকিৎসকে প্ৰকাশ কৰা মতে তেওঁ এতিয়া বিপদমুক্ত।
জৰ্ডান হেটমেকাৰে তেওঁৰ জীয়াই থকাটোক “অলৌকিক” বুলি মন্তব্য কৰিছে।
এই দুৰ্ঘটনাত জৰ্ডান হেটমেকাৰে পিঠি, ভৰি আৰু গোৰোহাত বেয়াকৈ আঘাত পাইছে। ১৩,৫০০ ফুট উচ্চতাৰ পৰা পৰি যোৱাৰ পিছতো জৰ্ডান হেটমেকাৰৰ জীৱন ৰক্ষা পৰা ঘটনাই বহুতোকে পুনৰবাৰ সোঁৱৰাই দিছে সেইশাৰী আপ্তবাক্য—’ৰাখে হৰি মাৰে কোনে?’
