উত্তৰ আৰু দক্ষিণ-পূব এছিয়াৰ কেইবাখনো দেশলৈ অবৈধভাৱে জন্তু সৰবৰাহ কৰাৰ বাবে উত্তৰ-পূৰ্বাঞ্চলক পৰিবহন পথ হিচাপে ব্যৱহাৰ কৰা হৈছে।
সংবাদ সংস্থা পিটিআইৰ সৈতে এই সাক্ষাৎকাৰত এই কথা প্ৰকাশ কৰিছে অসম বন বিভাগৰ এজন বিষয়াই।
“চোৰাং ব্যৱসায়ীসকলে এতিয়া গেকো, পেঙ্গোলিনৰ দৰে বিৰল জন্তুৰ সৰবৰাহত গুৰুত্ব দিছে। শেহতীয়াকৈ কেংগাৰু আৰু চিম্পাঞ্জি আদি জন্তুৰ সৰবৰাহৰ বাবে উত্তৰ-পূব ভাৰতক পৰিবহন পথ হিচাপে ব্যৱহাৰ কৰিছে।”- বিষয়াজনে কয়।
বিষয়াজনে লগতে কয় যে বন্যপ্ৰাণী সৰবৰাহ উত্তৰ-পূবত গুৰুত্বপূৰ্ণ চিন্তাৰ বিষয় হৈ পৰিছে। চোৰাং চিকাৰীয়ে এতিয়া বিপদাপন্ন আৰু বিৰল জন্তুবোৰক লক্ষ্য কৰি লৈছে।
উল্লেখ্য যে, মঙলবাৰে কাৰ্বি আংলং জিলাৰ বোকাজান উপ-সংমণ্ডলৰ দিলাই অঞ্চলৰ পৰা আৰক্ষীয়ে পাঁচটা চিম্পাঞ্জি উদ্ধাৰ কৰিছিল।
আৰক্ষীয়ে নথি-পত্ৰহীন এখন বাহনৰ তালাচীত ম্যানমাৰৰ পৰা চোৰাংকৈ অনা পাঁচটা চিম্পাঞ্জিক উদ্ধাৰ কৰিছিল।
চিম্পাঞ্জিকেইটাক বুধবাৰে মাঞ্জা ৰেঞ্জৰ বন বিভাগৰ বিষয়াৰ হাতত গতাই দিয়া হৈছিল।
জেৰাৰ সময়ত, সন্দেহযুক্ত চোৰাং ব্যৱসায়ী দুজনে মণিপুৰৰ থৌবাল জিলাৰ পৰা আহিছে বুলি উল্লেখ কৰিছিল।
