যোৱা নিশা ৰাজ্যত দুটাকৈ আৰক্ষীৰ এনকাউণ্টাৰৰ ঘটনাত এজন সাংবাদিককে ধৰি এজন শিশু বলাৎকাৰী আহত হয়।
এনকাউণ্টাৰৰ প্ৰথম ঘটনাটো ঘটে ধুবুৰী জিলাৰ আগমণিত।
মঙলবাৰে জিনকাটাত সুভাষ বৰ্মণ নামৰ এজন প্ৰাক্তন আলফা সদস্যলৈ গুলীচলনা কৰি দুৰ্বৃত্তই কাঢ়ি লৈ গৈছিল প্ৰাক্তন আলফা সদস্য জনৰ বাইককে ধৰি নগদ ধন।
এই ঘটনাৰ সৈতে জৰিত থকাৰ অভিযোগত আৰক্ষীয়ে বাহাৰুল ইছলাম নামৰ ৱেব পৰ্টেল এটাৰ এজন সাংবাদিকৰ লগতে আছমত আলী নামৰ আন এজন লোকক গ্ৰেপ্তাৰ কৰিছিল।
আৰক্ষীয়ে ধৃত সাংবাদিক জনক লুকুৱাই ৰখা পিষ্টল দেখুৱাই দিবলৈ যোৱা নিশা আগমণিৰ এক বিশেষ স্থানলৈ লৈ যোৱাৰ সময়তে সাংবাদিক জনে পলায়নৰ চেষ্টা কৰে।
ফলত আৰক্ষীয়ে গুলীচালনা কৰিবলৈ বাধ্য হয়।
আৰক্ষীৰ গুলীত অভিযুক্ত সাংবাদিক বাহাৰুল ইছলাম গুৰুতৰ ভাবে আহত হয়। আহত সাংবাদিক জনক ধুবুৰী অসামৰিক চিকিৎসালয়ত ভৰ্তি কৰোৱা হৈছে।
ধৃত সাংবাদিক জনৰ বিৰুদ্ধে ভাৰতীয় দণ্ডবিধিৰ ৩৯৪, ৩৯৭ কে ধৰি কেইবাটাও ধাৰাত গোচৰ পঞ্জীয়ন কৰা হৈছে।
অবৈধ ভাবে অস্ত্ৰ ৰখাৰ অভিযোগত বাহাৰুল ইছলামৰ বিৰুদ্ধে অস্ত্ৰ আইনৰ ২৫৯(১)(ক) ধাৰাতো গোচৰ পঞ্জীয়ন হৈছে।
একেদৰে যোৱা নিশা নগাঁও জিলাৰ বটদ্ৰৱাত আৰক্ষীৰ গুলীত আহত হয় ইদ্ৰিছ আলী নামৰ এজন শিশু বলাৎকাৰী।
১৯ এপ্ৰিলৰ দিনা আচাৰ খুওৱাৰ প্ৰলোভনেৰে ইদ্ৰিছ আলীয়ে এটি শিশুক বলাৎকাৰ কৰিছিল।
কালি আৰক্ষীয়ে বটদ্ৰৱাৰ পুঠিমাৰী গাঁৱৰ পৰা শিশু বলাৎকাৰী আলীক গ্ৰেপ্তাৰ কৰিছিল।
নিশা আৰক্ষীৰ জিম্মাৰ পৰা পলায়নৰ চেষ্টা চলোৱাৰ সময়তে আৰক্ষীয়ে শিশু বলাৎকাৰী ইদ্ৰিছ আলীলৈ লক্ষ্য কৰি গুলীচালনা কৰে।
ফলত শিশু বলাৎকাৰী জন গুৰুতৰ ভাবে আহত হয়। একে নিশাই ৰাজ্যত ঘটা দুটাকৈ আৰক্ষীৰ এনকাউণ্টাৰৰ ঘটনাই চাঞ্চল্যৰ সৃষ্টি কৰিছে।
