নিষিদ্ধ ঘোষিত সংগঠন আলফা (স্বাধীন) লৈ ৰাজ্যৰ যুৱ প্ৰজন্মৰ নতুনকৈ বৃদ্ধি পোৱা ধাউতিৰ মাজতে যুৱক-যুৱতীসকলক নিষিদ্ধ সংগঠনটোত যোগদান নকৰিবলৈ আহ্বান জনাইছে আৰক্ষী সঞ্চালক প্ৰধান ভাস্কৰ জ্যোতি মহন্তই।
তেওঁ কয় যে এতিয়া অসমত শান্তি আহিছে আৰু ভয় তথা সন্ত্ৰাসৰ পৰিৱেশ ক্ৰমান্বয়ে সমাপ্ত হৈছে। এনে পৰিস্থিতিত তেওঁ যুৱক-যুৱতীসকলক পুনৰ তেজৰ ফাকু খেলাৰ পৰা আঁতৰি আহিবলৈ আহ্বান জনাইছে।
লগতে তেওঁ আলফাৰ সেনাধ্যক্ষক যুৱকসকলক ইয়াত অন্তৰ্ভুক্ত নকৰি, আনকি কোনো যুৱক-যুৱতী আলফালৈ গ’লেও ঘূৰাই পঠাবলৈ আহ্বান জনায়।
আনহাতে আলফা (স্বাধীন) লৈ যুৱক-যুৱতীৰ গমন সন্দৰ্ভত আজি প্ৰতিক্ৰিয়া প্ৰকাশ কৰিছে ৰাষ্ট্ৰীয় পৰ্যায়ৰ মানৱ অধিকাৰ তথা সমাজ কৰ্মী ডঃ দিব্যজ্যোতি শইকীয়াই।
ডঃ শইকীয়াই কয় যে বিগত সময়চোৱাত পঞ্চাশ জনতকৈ অধিক যুৱক-যুৱতী তথা বিবাহিত লোকে আলফাত যোগদান কৰি অসম এৰা খবৰে তেওঁক উদ্বিগ্ন কৰি তুলিছে।
তেঁও নৱপ্ৰজন্মক আলফাৰ দৰে সংগঠনত যোগদান কৰাৰ বিপৰীতে সৃষ্টিশীল কৰ্মৰ লগতে কৃষি আৰু ক্ষুদ্ৰ উদ্যোগ আদিত নিজকে আত্মনিয়োগ কৰিবলৈ আহ্বান জনায়।
সন্ত্ৰাসবাদ কেতিয়াও দেশ নিৰ্মাণৰ সুপথ হব নোৱাৰে বুলি উল্লেখ কৰি তেওঁ লগতে অসম চৰকাৰকো তীক্ষ্ণ সমালোচনা কৰে। ডঃ শইকীয়াই কয় যে অসম চৰকাৰে যুৱক-যুৱতী সকলক যি ধৰণেৰে বিভিন্ন প্ৰকাৰে নিয়োগৰ ব্যৱস্থা কৰিব লাগিছিল সেই ধৰণে ব্যৱস্থা নকৰাৰ লগতে এনেধৰণৰ বিদ্রোহী সংগঠনত যোগদান কৰাত বাধা আৰোপ কৰাত সম্পূৰ্ণ ব্যৰ্থ হৈছে।
আনহে নালাগে চৰকাৰে কোনো ধৰণৰ সজাগতামূলক ব্যৱস্থাও গ্ৰহণ কৰা নাই বুলি তেওঁ অভিযোগ কৰে। চৰকাৰক উচিত পদক্ষেপ গ্ৰহণ কৰিবলৈ আহ্বান জনোৱাৰ লগতে অসমৰ যুৱ প্ৰজন্মৰ প্ৰতিজন অবিভাৱকক অধিক সতৰ্কতা অৱলম্বন কৰি নিজ নিজ সন্তানৰ প্ৰতি দৃষ্টি ৰাখিবলৈ আহ্বান জনায়।
আনহাতে এই সন্দৰ্ভত কংগ্ৰেছৰ সাংসদ গৌৰৱ গগৈয়ে কয় যে নিবনুৱা সমস্যাৰ বাবে মানুহ বিচলিত হৈ উগ্ৰপন্থী হৈ পৰিছে।
চৰকাৰে যুৱসকলক নিযুক্তি প্ৰদান কৰাত ব্যৰ্থ হৈছে বুলি মন্তব্য কৰি গৌৰৱ গগৈয়ে কয় যে চৰকাৰ কেৱল মন্দিৰ-মছজিদৰ যুদ্ধৰ ব্যৱস্থাত আছে। যুৱকসকল এতিয়া হতাশ। সেইকাৰণে তেওঁলোকক পথভ্ৰষ্ট হ’বলৈ আৰু ভুল পথত খোজ কাঢ়িবলৈ বাধ্য কৰা হৈছে।
