কইনা অসমৰ, দৰা বিদেশৰ।
সাত সাগৰ তেৰ নদী পাৰ হৈ অসমৰ কইনা নিবলৈ আহিল বিদেশৰ দৰা।
হাতত হেংদাং লৈ দৰাৰ পণ, বিপদৰ সময়ত সদায় থাকিব লগত।
হয়। শিৱসাগৰৰ এখন বিয়াই লাভ কৰিছে চৰ্চা।
শিৱসাগৰৰ খাটপথাৰৰ জীয়াৰী ৰাজকুমাৰী লোপামুদ্ৰা গগৈৰ লগত যুগ্ম জীৱনৰ পাতনি মেলিবলৈ আহিল সুদুৰ লণ্ডনৰ দৰা poul Anthony Harewood। লগত আহিল এন্থনিৰ পিতৃ-মাতৃ, ভাতৃ আৰু বহু আত্মীয়।
লকডাউনৰ সময়ত মোবাইলত অনলাইন গেম খেলি চিনাকী হৈছিল দুয়ো। লাহে লাহে গঢ়ি উঠিছিল বন্ধুত্ব। শেষত মংগলবাৰে সম্পন্ন হল দুয়োৰে বিবাহ।
সম্পূৰ্ণ চকলং পদ্ধতিৰে এন্থনি আৰু লোপামুদ্ৰাৰ বিবাহ সম্পন্ন হয়। ৰুমালেৰে মুখ ঢাকি অসমীয়া দৰা সাজে বিবাহ মণ্ডপত বহিল দৰা এন্থনি।
অসমীয়া কইনা পাই আনন্দত আত্মহাৰা দৰা প’ল এন্থনিৰ মাতৃ তথা ভাতৃ। অসমীয়া পাতৰ চাদৰ মেখেলা পিন্ধি বিহু নাচিলে দৰাৰ মাতৃয়ে। ঢোলৰ শব্দত ৰৈ নাথাকিল ভাতৃও।
এইদৰে সম্পন্ন হয় এন্থনি আৰু লোপামুদ্ৰাৰ বিবাহ। বিদেশৰ জোৱাইক চাবলৈ কইনাঘৰত ভিৰ কৰেহি বহু লোকে। উৰুলি আৰু মাংগলিক ধ্বনিৰে দিলে সকলোৱে আৰ্শীবাদ।
