ৰাজ্যখনত দলৰ কৰ্মীসকলৰ সুৰক্ষা বিচাৰি চিপিআইএমৰ এটা প্ৰতিনিধি দলে সাক্ষাৎ কৰাৰ সময়ত ত্ৰিপুৰাৰ মুখ্যমন্ত্ৰী বিপ্লৱ কুমাৰ দেৱে তেওঁলোকক প্ৰতিশ্ৰুতি দি কয় যে কিছুমান চিপিআইএম আৰু আন ৰাজনৈতিক দলৰ ‘অত্যুৎসাহী’ দুৰ্বৃত্তই বাওঁপন্থী সমৰ্থক আৰু আন বাওঁপন্থী দলৰ কাৰ্যালয়ত আক্ৰমণৰ বাবে দায়ী।
বিধানসভাৰ নিৰ্বাচনী ফলাফল ওলেৱাৰ পিছত যোৱা মাৰ্চ মাহৰ প্ৰথম ভাগত ত্ৰিপুৰাত দলৰ কৰ্মী আৰু কাৰ্যালয়ত সংঘটিত আক্ৰমণ সম্পৰ্কত চিপিআইএমৰ প্ৰতিনিধি দলটোৱে শনিবাৰে মুখ্যমন্ত্ৰীগৰাকীক সাক্ষাৎ কৰিছিল।
এই হিংসাৰ বাবে বাওঁমৰ্চাই ভাৰতীয় জনতা পাৰ্টি আৰু ইয়াৰ মিত্ৰ দল আইপিএফটিক জগৰীয়া কৰি অভিযোগ আনিছিল।
শনিবাৰে আবেলি চিপিআইএমৰ মুখ্য কাৰ্যালয়ত সাংবাদিকৰ আগত বক্তৱ্য ৰাখি দলৰ ৰাজ্যিক সম্পাদকবিজন ধৰে কয় যে বাওঁমৰ্চাৰ এটি পাঁচজনীয়া প্ৰতিনিধি দলে মুখ্যমন্ত্ৰী বিপ্লৱ কুমাৰ দেৱক সাক্ষাৎ কৰি ৰাজ্যখনত বাওঁমৰ্চাৰ কৰ্মী তথা ট্ৰেড য়ুনিয়নৰ কাৰ্যালয়ত আক্ৰমণ বন্ধ কৰিবলৈ মুখ্যমন্ত্ৰীৰ হস্তক্ষেপ বিচাৰিছে।
বাওঁমৰ্চাৰ নেতাসকলে লগতে নিৰ্বাচনোত্তৰ কালত ত্ৰিপুৰাত বিজেপি আৰু আইপিএফটি সমৰ্থকে কৰা আক্ৰমণৰ তিনিখন তালিকাও দাখিল কৰে।
তালিকাখনত দাবী কৰা মতে যোৱা ৩ মাৰ্চৰ পৰা এতিয়ালৈকে ৯৩ টা অগ্নিসংযোগৰ ঘটনা, ২৩০ টা লণ্ডভণ্ড কৰাৰ ঘটনা, ৫২ টা তলা বন্ধ কৰা আৰু ৬৩ টা দলীয়া কাৰ্যালয় দখল কৰাৰ ঘটনাকে ধৰি মুঠ ৪৩৮ টা আক্ৰমণৰ ঘটনা সংঘটিত হৈছে।
বাওঁমৰ্চাই লগতে দাবী কৰা মতে ১৭০০ তকৈয়ো অধিক বাওঁমৰ্চাৰ সমৰ্থক আৰু নেতাৰ ঘৰত আক্ৰমণৰ ঘটনা সংঘটিত হৈছে।
অৱশ্যে, মুখ্যমন্ত্ৰীয়ে এই আক্ৰমণত বিজেপিৰ ভূমিকা থকাৰ কথা অস্বীকাৰ কৰিছে আৰু চিপিআইএমকে ধৰি আন ৰাজনৈতিক দলহে বাওঁ দলৰ ওপৰত সংঘটিত আক্ৰমণৰ ঘটনাত দায়ী বুলি দোহাৰিছে।
মুখ্যমন্ত্ৰীগৰাকীয়ে লগতে এই আক্ৰমণৰ ঘটনাৰ লগত জড়িত যিকোনো ব্যক্তিৰ বিৰুদ্ধে কঠোৰ ব্যৱস্থা গ্ৰহণৰ আশ্বাস দিছে।
ধৰে লগতে সংবাদ মাধ্যমক কয় যে মুখ্যমন্ত্ৰীৰ সৈতে হোৱা আলোচনাত তেওঁলোক সন্তুষ্ট হৈছে।
