বৰপেটা জিলাৰ পহুমাৰা নদীত আজি এটা গাঙ্গেতিক ডলফিনৰ মৃতদেহ ওপঙি থকা অৱস্থাত উদ্ধাৰ কৰা হয়। স্থানীয় লোকে প্ৰথমে মৃত ডলফিনটো দেখা পায় আৰু লগে লগে বন বিভাগক অৱগত কৰে।
খবৰ লাভ কৰাৰ পিছতে বৰপেটা ৰোড বন পৰিসৰৰ কাৰ্যালয়ৰ এটা দল আৰু আৰণ্যক এনজিঅ’ৰ সদস্যসকল ঘটনাস্থলীত উপস্থিত হয় আৰু মৃত ডলফিনটো উদ্ধাৰ কৰে।
“আমি মৃত ডলফিনটো নদীত ওপঙি থকা দেখিছিলো। ডলফিনটো উদ্ধাৰ কৰি বৰপেটা পথ বন পৰিসৰৰ কাৰ্যালয়লৈ অনা হয়। ডলফিনটোৰ ওজন প্ৰায় ৭০ কিলোগ্ৰাম বুলি অনুমান কৰা হৈছে।”- সংবাদ মাধ্যমৰ আগত এজন বন বিষয়াই কয়।
বিষয়াজনে লগতে কয় যে মাছ ধৰা জালত লগাৰ পিছত ডলফিনটোৰ মৃত্যু হৈছে বুলি সন্দেহ কৰা হৈছে। ডলফিনটোৰ শৰীৰৰ বেছিভাগ অঙ্গ পচি গৈছে বুলি উল্লেখ কৰি তেওঁ ইতিমধ্যে মৰণোত্তৰ পৰীক্ষা কৰা হৈছে বুলি জানিবলৈ দিয়ে।
কোনো ৰোগত আক্ৰান্ত হোৱাৰ বাবে ডলফিনটোৰ মৃত্যু হোৱা নাই বুলিও বিষয়াজনে লগতে নিশ্চিত কৰে।
উল্লেখ্য যে গঙ্গা ডলফিনক ২০০৮ চনত অসমৰ ৰাজ্যিক জলজ প্ৰাণী হিচাপে স্বীকৃতি দিয়া হৈছিল আৰু ২০০৯ চনত ভাৰতীয় ৰাষ্ট্ৰীয় জলজ প্ৰাণী হিচাপে ঘোষণা কৰা হৈছিল।
ভাৰতীয় উপমহাদেশত নদী ডলফিন বোৰ বিশেষকৈ গঙ্গা আৰু ব্ৰহ্মপুত্ৰ, বাংলাদেশৰ মেঘনা আৰু নেপালৰ কাৰ্ণাফুলিনদী প্ৰণালীত পোৱা যায়। বৰ্তমান ভাৰতত ডলফিনৰ সংখ্যা ৩,০০০ ৰ পৰা ৩,৫০০ বুলি অনুমান কৰা হৈছে। ইয়াৰে ব্ৰহ্মপুত্ৰত প্ৰায় ২৫০-৩০০ ডলফিন আছে বুলি অনুমান কৰা হৈছে।
বন্যপ্ৰাণী (সুৰক্ষা) আইন, ১৯৭২-ৰ অনুসূচী ১-ত অন্তৰ্ভুক্ত ডলফিনৰ মূলত ছালৰ চোৰাং বেহাৰ বাবে চোৰাং চিকাৰীয়ে সঘনাই চিকাৰ কৰে।
