দেশৰ ৰাজনীতিত ধুমুহাৰ সৃষ্টি কৰা মহাৰাষ্ট্ৰৰ ৰাজনৈতিক অস্থিৰতাৰ অভিকেন্দ্ৰ হৈ পৰিছে অসম। মহাৰাষ্ট্ৰৰ শাসনাধিষ্ঠ চৰকাৰৰ বিৰুদ্ধে বিদ্ৰোৰ সূচনা কৰা বিসম্বাদী বিধায়কে যোৱা কেইদিনমানৰ পৰা বাহৰ পাতি আছে গুৱাহাটীত। মহাৰাষ্ট্ৰৰ বিধায়কৰ এই গুৱাহাটীত আশ্ৰয়ক কেন্দ্ৰ কৰি আজি অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে সোচ্চাৰ হৈ পৰে ৰাজ্যসভাৰ সাংসদ অজিত ভূঞা।
আজি এক সংবাদমেল যোগে আঞ্চলিক গণ মৰ্চাৰ সভাপতি অজিত কুমাৰ ভূঞাই মুখ্যমন্ত্রী ড° হিমন্ত বিশ্ব শৰ্মাক বিধায়ক বেচা-কিনা কৰা ৰাজনীতিৰ ঠিকাদাৰ বুলি অভিহিত কৰি অসমক নিকৃষ্ট আৰু অগণতান্ত্ৰিক ৰাজনৈতিক কুচকাৱাজৰ ঘাটিত পৰিণত কৰিলে বুলি মন্তব্য কৰে।
ভূঞাই কয়, “নিজ ৰাজ্যৰ ৫৬ লাখ মানুহে বানপানীৰ মাজত ছটফটাই থকাৰ সময়ত বহিৰাজ্যৰ ৰাজনীতিৰ চাণক্য হ’বলৈ গৈ অসমবাসীৰ চকুত বহুৱা হৈ পৰা মুখ্যমন্ত্ৰীজনে অসমৰ ৰাইজৰ এই চৰম দুর্দিন প্রধানমন্ত্রী, গৃহমন্ত্রী বা অন্য কেন্দ্রীয় নেতাৰ দল আনি অসমৰ বিধ্বস্ত ৰূপটো পিছে দেখুৱাব নোৱাৰিলে।
বিহাৰ, পশ্চিমবংগত ইয়াতকৈ বহু কম বিপদতো সেইবোৰ ৰাজ্যলৈ এইসকল নেতা দৌৰ মৰাৰ অগণন নজীৰ আছে। ইমান ‘কর্মঠ’ মুখ্যমন্ত্রী হৈ বিপদকালত প্ৰাপ্য সহায়-সাহায্যৰ এটকাও দিল্লীৰ পৰা উলিয়াই আনিব নোৱৰাৰ ৰহস্য কি সেয়াও আমাৰ বাবে মাথৰ লাজ থকা মানুহ হ’লে নিশ্চয় তেওঁক এইবোৰ কথাছ লাজ দিলেহেঁতেন!”
অসমৰ এই দুঃসময়ত মহাৰাষ্ট্ৰৰ দুকুৰি পলৰীয়া বিধায়কক গুৱাহাটীৰ পঞ্চতাৰকা হোটেলত ৰাজ-অতিথ্য দি দৈনিক প্রায় ৩৫-৪০ লাখ টকাৰ শৰাধ কৰিছে বুলি অভিযোগ কৰি ৰাজনীতিৰ সকলো নীতি, সকলো আদর্শ ভৰিৰে মোহাৰি দিল্লীৰ বি জে পি নেতৃত্বৰ শ্ৰুতলিপি লৈ অসমৰ তথাকথিত ‘দক্ষ’ মুখ্যমন্ত্ৰীজনে অসমৰ মানুহৰ সকলো সম্মান, সকলো অহংকাৰ ধুলিস্যাৎ কৰি দিলে বুলি হিমন্ত বিশ্ব শৰ্মাক কটাক্ষ কৰে সাংসদ গৰাকীয়ে।
“আজি হিমন্ত বিশ্ব শৰ্মাই ভাৰতবাসীৰ ওচৰত অসমৰ ৰাইজৰ আত্মসম্মান বিক্ৰী কৰি দিলে। বিজেপিৰ প্রতিশ্রুতি আছিল ‘মিছন ফাৰ্ষ্ট, পাটী ছেকেণ্ড, তাৰ পিছতহে ব্যক্তি। এতিয়া পিছে কি হৈ আছে? জনতাৰ প্ৰতি সেৱা ক’ত আজি? হিমন্ত বিশ্ব শৰ্মাই মহাৰাষ্ট্ৰৰ বিধায়ক বেচা-কিনাৰ ঠিকাদাৰীত নামিছে, ৰাইজৰ স্বাৰ্থই স্থান নাপালে তাত। গণতন্ত্র ধ্বংস কৰাৰ বাহিৰে আজি অসমৰ মুখ্যমন্ত্ৰী গৰাকীয়ে কি কৰিছে ৰাইজক উত্তৰ দিব লাগে।”-ভূঞাই কয়।
অজিত ভূঞাৰ মতে, মহাৰাষ্ট্ৰৰ দুকুৰি ‘পলৰীয়া’ বিধায়কক অসমৰ মাটিত ঘাটি পাতি গণতন্ত্ৰক কবৰ দিবলৈ ষড়যন্ত্ৰ ৰচনাৰ সুবিধা কৰি দি নিজকে সৰ্বকালৰ ‘দুষ্ট প্রকৃতিৰ মুখ্যমন্ত্ৰী’ৰ ৰূপত প্ৰক্ষেপ কৰিলে হিমন্ত বিশ্ব শৰ্মাই। গণতন্ত্ৰৰ টেটু চেপি ধৰা ষড়যন্ত্ৰকাৰী বিধায়কসকলক ‘লক্ষ্মী’ বুলি অভিহিত কৰি অসমৰ ৰাইজক মুখ্যমন্ত্ৰীজনে চৰম অপমান কৰিছে বুলিও তেওঁ লগতে কয়।
সাংসদ গৰাকীয়ে লগতে দাবী কৰে যে বিজ্ঞাপনৰ জোৰত টিকি থকা এইখন চৰকাৰৰ ভিতৰখন সমূলি ফোপোলা। এই সকলো দেখি-শুনি বুজিও অসমৰ ৰাইজে অন্যায়ৰ প্ৰতিবাদ কৰিবলৈ এৰিলে কাৰণেই হিমন্ত বিশ্ব শৰ্মাৰ দৰে নেতাবোৰে তাৰ সুবিধা গ্রহণ কৰি আছে। “কেৱল মিথ্যাচাৰ, কেৱল ভণ্ডামিৰে এখন ৰাজ্যৰ শাসন চলিব পাৰেনে? এইবোৰৰ উত্তৰ অসমৰ ৰাইজে বিচাৰিবই। এই অন্যায়, এই দুৰাচাৰী চৰিত্ৰৰ যোগ্য উত্তৰ এদিন অসমৰ ৰাইজেই দিব”- ভূঞাই কয়।
অসমক মহাৰাষ্ট্ৰৰ কলংকিত ৰাজনীতিৰ অংশীদাৰ কৰাৰ জবাব হিমন্ত বিশ্ব শৰ্মাই দিবলৈ সাজু হৈ থাকক বুলি অজিত ভূঞাই লগতে মুখ্যমন্ত্ৰী হিমন্ত বিশ্ব শৰ্মাক সকীয়াই দিয়ে।
