শ্ৰেণী কোঠাৰ সলনি যুদ্ধক্ষেত্ৰৰ বাংকাৰৰ পৰাই ছাত্ৰী-ছাত্ৰীৰ বাবে অনলাইন ক্লাছ কৰিছে এগৰাকী ’অধ্যাপক সেনাই’!

পেছাত তেওঁ এগৰাকী অধ্যাপক। সেই সূত্ৰে তেওঁ ব্যস্ত থাকিব লাগিছিল ফ্ৰেণী কোঠাত । কিন্তু সময়ে তেওঁক তেনে কৰিবলৈ দিয়া নাই। ইধ্যাপনাৰ সলনি তেওঁ হাতত তুলি ল’বলগীয়া হৈ অস্ত্ৰ। কাৰণ মাতৃভূমি আজি বিপদাপন্ন। হয়, মাতৃভূমি ইউক্ৰেইনক ৰাছিয়াৰ আগ্ৰাসনৰ পৰা ৰক্ষা কৰাৰ বাবেই এই গৰাকী অধ্যাপকে বিশ্ববিদ্যালয়ৰ চৌহদৰ পৰা ওলাই আহি দেশ খনৰ সেনাত যোগদান কৰিছে।

সেনাৰ সাজ পিন্ধি তেওঁ আশ্ৰয় লৈছে আৰু প্ৰতাপী ৰাছিয়াৰ সেনাৰ বিৰুদ্ধে চলাই গৈছে যুদ্ধ। যুদ্ধৰ মাজতে তে্ওঁ পিছে পাহৰা নাই ছাত্ৰ-ছাত্ৰীসকলৰ কথা। সেইবাবেই যুদ্ধৰ মাজতে অৱকাশ পালেই তেওঁ মোবাইল ফোনৰ সহায়ত চলাই গৈছে অনলাইন ক্লাছ।

নিজৰ কৰ্তব্যৰ প্ৰতি অতি সচেতন এই গৰাকী অধ্যাপকৰ নাম ফেডিৰ শ্বেণ্ড । বিশ্ববিদ্যালয়ৰ অধ্যাপকজনে ৰাছিয়াই ইউক্ৰেইন আক্ৰমণ কৰাৰ কিছুদিন পিছৰে পৰাই অনলাইনত ক্লাছ কৰি আহিছে। ৰাছিয়াৰ আক্ৰমণ প্ৰতিহত কৰিবলৈ ইউক্ৰেইনৰ হাজাৰ হাজাৰ অসামৰিক লোকে সেনাত যোগ দিছে। তেওঁলোকৰ ভিতৰৰে ফেডিৰ শ্বেণ্ডো এজন।

৪৭ বছৰীয়া ব্যক্তিজনে বাংকাৰৰ পৰাই শিক্ষাৰ্থীৰ বাবে অনলাইন ক্লাছ কৰাৰ বাবে সামৰিক বাহিনীলৈ অনুমতি বিচাৰি আবেদন কৰিছিল। সামৰিক বাহিনীয়ে সেই অনুমতি দিয়াৰ পিছতে তেওঁ বাংকাৰৰ পৰাই চলাই গৈছে অনলাইন ক্লাছ।
তেওঁ পৰ্যটন আৰু সমাজবিজ্ঞান বিষয়ত অনলাইন ক্লাছ কৰি আহিছে।

নিজৰ অভিজ্ঞতাৰ বিষয়ে ফেডিৰ শ্বেণ্ডই কয়” মই ২৭ বছৰ ধৰি শিক্ষকতা কৰি আছো। মই এই বৃত্তি এৰিব নোৱাৰো। ফেব্ৰুৱাৰীত ৰাছিয়াই আমাৰ দেশ আক্ৰমণ কৰাৰ পিছৰে পৰা মই সামৰিক বাহিনীতযোগ দিছো।

কিন্তু শিক্ষাৰ্থীসকলৰ কথাও মই পাহৰিলে নহ’ব। সেয়ে মই অনলাইন ক্লাছ কৰি গৈছো ।” এগৰাকী শিক্ষাৰ্থী, ২০ বছৰীয়া ইৰিনাই কয় “তেওঁ সদায় আমাক কৈ আহিছে যে আমি স্মাৰ্ট হ’ব লাগিব, আমি এখন স্মাৰ্ট ৰাষ্ট্ৰৰ বাবে যুঁজি আছো।তেওঁৰ কামবোৰে আমাক অনুপ্ৰাণিত কৰে” ।

কিন্তু বাংকাৰত থাকি শিক্ষা দান কৰাটো সহজ নহয়। কাৰণ গোলাবৰ্ষণৰ শব্দই পাঠদানৰ পৰিবেশটোকেই নোহোৱা কৰি পেলায়। তথাপি হাৰ মনা নাই অধ্যাপক ফেডিৰ শ্বেণ্ডে। শিক্ষাৰ্থীসকল তেওঁ পাঠদানৰ মাজে মাজে বিভিন্ন মিছাইলৰ বিষয়েও কৈ আহিছে।

ইউক্ৰেইনৰ শিক্ষা মন্ত্ৰী চেৰহি স্কাৰলেটে কয়, “এতিয়ালৈকে প্ৰায় ৯০০ শিক্ষকে সশস্ত্ৰ বাহিনীত যোগদান কৰিছে।তেওঁলোকৰ দেশপ্ৰেম অতুলনীয় আমি তেওঁলোকৰ প্ৰত্যেকজনৰ বাবে গৌৰৱান্বিত”।