India to surpass China as world’s populous country আজি বিশ্ব জনসংখ্যা দিৱস। আজিৰ দিনটোত দেশৰ বাবে আছে এটা বিশেষ খবৰ। বিশ্বৰ সকলো দেশক হৰুৱাই এক নম্বৰ স্থান দখল কৰাৰ দিশে আগবাঢ়িছে ভাৰত। এয়া ৰাষ্ট্ৰসংঘৰ এক প্ৰতিবেদনত অনুমান কৰা হৈছে। কিন্তু কেনেকৈ আৰু কিহৰ ভিত্তিত কৰা হৈছে এই দাবী?
ৰাষ্ট্ৰসংঘৰ এক প্ৰতিবেদন অনুসৰি অহা বছৰ ভাৰতে চীনক অতিক্ৰম কৰি বিশ্বৰ সৰ্বাধিক জনবহুল দেশ হিচাপে পৰিগণিত হব পাৰে। সোমবাৰে প্ৰকাশ পোৱা এই প্ৰতিবেদনত কোৱা হৈছে যে ২০২২ চনৰ নৱেম্বৰৰ মাজভাগলৈকে বিশ্বৰ জনসংখ্যা আঠশ কোটি হ’ব বুলি অনুমান কৰা হৈছে।
ৰাষ্ট্ৰসংঘৰ জনসংখ্যা বিভাগৰ অৰ্থনৈতিক আৰু সামাজিক পৰিক্ৰমা ইউনিটে এই প্ৰতিবেদন প্ৰকাশ কৰিছে।
১৯৫০ চনৰ পৰা বিশ্বৰ জনসংখ্যা আটাইতকৈ লেহেমীয়া গতিত বৃদ্ধি হৈ আহিছে। ২০২০ৰ পৰা এই গতি এক শতাংশতকৈও কমলৈ নামি আহিছে। ৰাষ্ট্ৰসংঘৰ নতুন প্ৰতিবেদন অনুসৰি ২০৩০ চনত বিশ্বৰ জনসংখ্যা প্ৰায় ৮.৫ বিলিয়ন আৰু ২০৫০ চনত ৯.৭ বিলিয়নলৈ বৃদ্ধি পাব পাৰে।
প্ৰতিবেদনত কোৱা হৈছে যে ২০২৩ চনত ভাৰতে চীনক পিছ পেলাই বিশ্বৰ সৰ্বাধিক জনবহুল দেশ হিচাপে স্থান লাভ কৰিব। ২০২২ চনত বিশ্বৰ আটাইতকৈ বেছি জনবহুল অঞ্চল দুটা হৈছে পূব আৰু দক্ষিণ-পূব এছিয়া, য’ত ২.৩ বিলিয়ন লোকে বাস কৰে। তেওঁলোকে বিশ্বৰ ২৯ শতাংশ জনসংখ্যাক প্ৰতিনিধিত্ব কৰে। মধ্য আৰু দক্ষিণ এছিয়াত ২.১ বিলিয়ন লোক আছে, যিয়ে বিশ্বৰ মুঠ জনসংখ্যাৰ ২৬ শতাংশক প্ৰতিনিধিত্ব কৰে।
প্ৰতিবেদন অনুসৰি ২০২২ চনত ভাৰতৰ জনসংখ্যা হৈছে ১৪১.২ কোটি, আনহাতে চীনৰ জনসংখ্যা হৈছে ১৪২.৬ কোটি। ২০২৩ চনৰ ভিতৰত চীনক অতিক্ৰম কৰি বিশ্বৰ সৰ্বাধিক জনবহুল দেশ হিচাপে পৰিগণিত হ’বলগীয়া ভাৰতৰ জনসংখ্যা ২০৫০ চনত ১৬৬.৮ কোটি হ’ব বুলি অনুমান কৰা হৈছে।
নিশ্চয় এয়া সুখকৰ খবৰ নহয়। বিভিন্ন সমস্যাৰে জৰ্জৰিত ভাৰতৰ দৰে দেশত, জনসংখ্যা বৃদ্ধিৰ হাৰ সৰ্বাধিক। জনসংখ্যা বৃদ্ধিয়ে এতিয়ালৈ সমাধা নোহোৱা সমস্যাবোৰ আৰু অধিক জটিলহে কৰি তুলিব। চৰকাৰৰ জনসংখ্যা নিয়ন্ত্ৰণ নীতিৰ ওপৰতো ৰাষ্ট্ৰসংঘৰ এই প্ৰতিবেদনে প্ৰশ্ন উত্থাপন কৰাৰ বাট মুকলি কৰি দিছে। কিমান কাৰ্যকৰী চৰকাৰী নীতিবোৰ! নে অকল মুখত কথাৰ ফুলজাৰীহে!
