West Bengal SSC scam একেৰাহে ২৬ ঘণ্টা মাৰাথন জেৰাৰ পিছত শনিবাৰে ৰাতিপুৱা ইডিয়ে পশ্চিমবংগ চৰকাৰৰ উদ্যোগ আৰু বাণিজ্য মন্ত্ৰী পাৰ্থ চট্টোপাধ্যায়ক গ্ৰেপ্তাৰ কৰে। জেৰাত ধৰা পৰা বিসংগতিৰ বাবে প্ৰাক্তন শিক্ষা মন্ত্ৰীজনক ইডিয়ে গ্ৰেপ্তাৰ কৰে। তেওঁৰ ঘৰৰ পৰা বহু নথি পত্ৰ জব্দ কৰা হৈছে। তেওঁৰ ঘৰত কেন্দ্ৰীয় বাহিনী মোতায়েন কৰা হৈছে।
তদন্তকাৰী সংস্থাটোৱে প্ৰাক্তন শিক্ষা মন্ত্ৰীজনৰ অধিবক্তাক নিশা প্ৰায় ১০ বজাত মাতি পঠিয়াইছিল। তাৰ পিছত নিশা প্ৰায় ১০-৩০ বজাত আন এজন ইডিৰ বিষয়া পাৰ্থ চট্টোপাধ্যায়ৰ নাকতলাৰ ঘৰলৈ আহিছিল। তেওঁৰ লগত আহিছিল কেন্দ্ৰীয় বাহিনীৰ আন পাঁচজন জোৱান। টকা গণনাৰ মেচিনো অনা হৈছিল। দিনজোৰা জেৰাৰ পিছত অৱশেষত তেওঁক গ্ৰেপ্তাৰ কৰা হয়।
উল্লেখ্য যে কেইঘণ্টামান পূৰ্বে নিশা প্ৰায় ৮-১০ বজাত ইডিৰ দ্বাৰা পোষ্ট কৰা এটা টুইটটোত কোৱা হৈছিল যে মন্ত্ৰী পাৰ্থ চেটাৰ্জীৰ ঘনিষ্ঠ অৰ্পিতা মুখাৰ্জীৰ ঘৰৰ পৰা নগদ ২১ কোটি টকা উদ্ধাৰ কৰা হৈছে। ইডিয়ে কৈছিল যে অৰ্পিতাৰ ডায়মণ্ড চিটিৰ ঘৰত তালাচীৰ সময়ত এই বৃহৎ পৰিমাণৰ ধন উদ্ধাৰ কৰা হৈছে।
মন্ত্ৰীজনৰ ঘনিষ্ঠ সহযোগী অৰ্পিতাৰ ঘৰৰ পৰা বৃহৎ পৰিমানৰ সোণ, বৈদেশিক মুদ্ৰা আৰু ২০ টা মোবাইল ফোনো উদ্ধাৰ কৰা হৈছে। উদ্ধাৰ হোৱা ২১ কোটি টকাৰ উপাৰ্জনৰ উৎস কি, ২০ টা মোবাইল ফোনৰ প্ৰয়োজনীয়তা কি সেই প্ৰশ্নৰ উত্তৰ বিচাৰি ইডিয়ে অনুসন্ধান অব্যাহত ৰাখিছে। লগতে ম’বাইল ফোনৰ কল লিষ্টো পৰীক্ষা কৰি থকা হৈছে।
শুক্ৰবাৰে ৰাতিপুৱাৰ পৰা ইডিয়ে মন্ত্ৰী পাৰ্থ চেটাৰ্জীৰ ঘৰকে ধৰি ১৩ টা স্থানত তালাচী চলাইছিল। এক টুইটযোগে তদন্তকাৰী সংস্থাটোৱে স্পষ্ট কৰিছিল যে এছএছচি আৰু প্ৰাথমিক বোৰ্ডত নিযুক্তি সম্পৰ্কীয় গোচৰত তালাচী চলোৱা হৈছে। শুকুৰবাৰে পুৱা প্ৰায় ৭.১০ বজাত ইডিৰ দল পাৰ্থ চেটাৰ্জীৰ ঘৰত উপস্থিত হৈছিল। কল্যাণময় গাংগুলী, এছ পি সিনহা, বাগদাদৰ চন্দন মণ্ডলকে ধৰি আৰু আনসকলৰ বাসগৃহতো তালাচী চলোৱা হৈছিল। অৱশেষত পাৰ্থ চেটাৰ্জীৰ ঘনিষ্ঠ অৰ্পিতাৰ ঘৰৰ পৰা বৃহৎ পৰিমাণৰ নগদ ধন উদ্ধাৰ কৰা হয়।
অৰ্পিতা মুখাৰ্জীক শনিবাৰে ৰাতিপুৱা ১৬ ঘণ্টা সোধা-পোছা কৰাৰ পিছত গ্ৰেপ্তাৰ কৰা হৈছে। ইডি সূত্ৰৰ মতে তেওঁক ইডিৰ কাৰ্যালয়লৈ লৈ যোৱা হ’ব। অৰ্পিতাৰ ঘৰৰ সন্মুখতো কেন্দ্ৰীয় আৰক্ষী বাহিনী মোতায়েন কৰা হৈছে।
আনহাতে, পাৰ্থ চেটাৰ্জীক গ্ৰেপ্তাৰ কৰি চিজিঅ’ কমপ্লেক্সলৈ লৈ যোৱা হৈছে। তেওঁক আজি তদন্তকাৰী বিষয়াসকলে আদালতত হাজিৰ কৰিব।
পাৰ্থ চেটাৰ্জীৰ ঘনিষ্ঠ ৰহস্যময়ী অৰ্পিতা মুখাৰ্জীক গোটেই ৰাতি সোধা-পোছা কৰা হয়। তেওঁৰ তিনিটা ফ্লেটতো তালাচী চলোৱা হয়। অৰ্পিতা মুখাৰ্জীৰ গাড়ী চালককো সোধা-পোছা কৰা হৈছে। ইডি সূত্ৰই জানিবলৈ দিছে যে এতিয়ালৈকে বেংককৰ্মীসকলে ২১ কোটি টকা গণনা কৰিবলৈ সক্ষম হৈছে আৰু টকা গণনাৰ কাম চলি আছে।
চুবুৰীয়াই জানিবলৈ দিয়া মতে অৰ্পিতাই এক বিলাসী জীৱন যাপন কৰিছিল। পাৰ্থ চেটাৰ্জী সপ্তাহত প্ৰায় ৫ দিনেই ইয়ালৈ আহে। ইডিয়ে অভিযান চলাই যোৱাৰ পূৰ্বে প্ৰতিষ্ঠিত দামী কোম্পানীৰ ৭ ৰ পৰা ৮ খন গাড়ী লুকাই ৰাখিছে। ইডিয়ে এই বৃহৎ পৰিমাণৰ ধনৰ উৎস বিচাৰি উলিয়াবলৈ চেষ্টা অব্যাহত ৰাখিছে।
