CJI Ramana says Judges spend sleepless nights বহুতেই ভাবে যে ন্যায়াধীশ বা ন্যায়াধীশসকলৰ জীৱন বৰ সহজ। কিন্তু এইটো যে শুদ্ধ নহয় সেয়া ব্যক্ত কৰিলে দেশৰ মুখ্য ন্যায়াধীশ এন ভি ৰামানাই। ৰাঁচীৰ নেশ্যনেল ইউনিভাৰ্চিটি অফ ষ্টাডি এণ্ড ৰিচাৰ্ছ ইন ল- ত মুখ্য ন্যায়াধীশগৰাকীয়ে এক অনুষ্ঠানত অংশগ্ৰহণ কৰি ন্যায়াধীশৰ জীৱন কিমান যে কঠিন সেয়া নিজৰ বক্তৱ্যৰ জৰিয়তে দাঙি ধৰে।
তেওঁ কয়, “এগৰাকী ন্যায়াধীশৰ জীৱন সহজ নহয়। ন্যায়াধীশসকলে সপ্তাহৰ শেষ আৰু বন্ধৰ দিনবোৰতো কাম কৰে। বেছিভাগ সময়তে গুৰুত্বপূৰ্ণ পাৰিবাৰিক অনুষ্ঠানকে ধৰি জীৱনৰ বহু আনন্দ উপভোগ কৰিব নোৱাৰে।‘’
লগতে পঢ়ক: Meghalaya Crime & Politics: মেঘালয়ৰ প্ৰভাৱশালী বিজেপি নেতাৰ বিৰুদ্ধে ঘৰতে পতিতালয় চলোৱাৰ অভিযোগ
মুখ্য ন্যায়াধীশগৰাকীয়ে নিজৰ অনুভূতিৰ কথা প্ৰকাশ কৰি কয়, “মাজে মাজে মই ভাবো যে মোৰ নাতি-নাতিনীয়ে মোক ভালকৈ চিনিব পাৰিবতো!”
কেৱল সেয়াই নহয় মুখ্য ন্যায়াধীশগৰাকীয়ে লগতে এগৰাকী বিচাৰক বা ন্যায়াধীশে গোচৰ এটাৰ ৰায় প্ৰদান কৰিবলৈ কিমান কঠোৰ পৰিশ্ৰম কৰিব লগা হয় সেই কথাও উল্লেখ কৰে।
তেওঁ কয়, “প্ৰতি সপ্তাহত ১০০ কৈও অধিক গোচৰৰ বাবে প্ৰস্তুতি চলাব লগীয়া হয়। দুয়োপক্ষৰ যুক্তি শুনি স্বতন্ত্ৰভাৱে গৱেষণা কৰি তাৰপিছতহে গোচৰৰ ৰায়দান কৰা হয়।‘’
তদুপৰি, এগৰাকী জ্যেষ্ঠ ন্যায়াধীশে বিভিন্ন প্ৰশাসনিক দায়িত্বও চম্ভালিব লগীয়া হয় বুলি তেওঁ উল্লেখ কৰে। কেৱল সেয়াই শেষ নহয়, তেওঁ কয়, “এগৰাকী বিচাৰক বা ন্যায়াধীশে নিশা সাৰে থাকি গোচৰৰ নথিপত্ৰ পঢ়ি টোকা প্ৰস্তুত কৰিব লাগে। ইয়াৰ বাবে ঘণ্টাৰ পিছত ঘন্টা পাৰ হৈ যায়। বেছিভাগ দিনেই মাজনিশা কাটি যায়।‘’
লগতে পঢ়ক: Monkeypox: বৃদ্ধি পাইছে মাঙ্কিপক্সৰ সংক্ৰমণ; স্বাস্থ্য জৰুৰী অৱস্থা ঘোষণা WHOৰ
আনহাতে, মুখ্য ন্যায়াধীশগৰাকীয়ে তেওঁৰ বক্তৱ্যৰ সময়ত ন্যায়াধীশসকলৰ ওপৰত হোৱা বৰ্ধিত আক্ৰমণকলৈও উদ্বেগ প্ৰকাশ কৰে। এই সন্দৰ্ভত তেওঁ দেশৰ ন্যায়পালিকা শক্তিশালী কৰাৰ লগতে ন্যায়াধীশসকলক অধিক ক্ষমতা প্ৰদান কৰাৰ পৰামৰ্শ দিয়ে। মুখ্য ন্যায়াধীশগৰাকীয়ে কয়, “ন্যায়পালিকা ক্ষতিগ্ৰস্ত হ’লে গণতন্ত্ৰ ক্ষতিগ্ৰস্ত হয়।‘’
