মন্ত্ৰী অজন্তা নেওগে পদত্যাগ কৰক: মীৰা বৰঠাকুৰ

বৃহস্পতিবাৰে ৰাজীৱ ভৱনৰ সন্মুখত মন্ত্ৰী অজন্তা নেওগৰ বাসগৃহত নাৰীক অসৎ কাৰ্যত প্ৰবৃত্ত কৰোওৱাৰ নিকৃষ্ট ঘটনাৰ প্ৰতিবাদত আৰু মন্ত্ৰীগৰাকীৰ পদত্যাগৰ দাবীত অসম প্ৰদেশ মহিলা কংগ্ৰেছে মন্ত্ৰী অজন্তা নেওগৰ পুত্তলিকা দাহ কৰে।

পুত্তলিকা দাহ কৰাৰ পাছত অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে কয়,”আজি কিছুদিন ধৰি আমি লক্ষ্য কৰিছো মন্ত্ৰী অজন্তা নেওগৰ দেহৰক্ষীৰ দ্বাৰা এগৰাকী মহিলাক অসৎ ব্যৱহাৰ কৰাৰ অভিযোগ উত্থাপন হোৱাৰ পাছতো কোনো ব্যৱস্থা মন্ত্ৰী গৰাকীয়ে লোৱা নেদেখিলো। লগতে এগৰাকী দায়িত্ব সম্পন্ন মন্ত্ৰীৰ ঘৰত কি দৰে এনে অসৎ অভিপ্রায় জনিত কাৰ্য্য ঘটিবলৈ সাহস পালে ই এক বৃহৎ প্রশ্ন?’’

মীৰা বৰঠাকুৰে লগতে প্ৰশ্ন কৰে যে মন্ত্ৰীৰ ঘৰতেই যদি দেহৰক্ষীৰ ওচৰত মহিলাক অসৎ ব্যৱহাৰ কৰা হয় তেনেস্থলত সাধাৰণ মহিলাৰ সুৰক্ষা ক’ত?

বৰঠাকুৰে কয়, ‘’এইখন বিজেপি চৰকাৰে “Beti Bachao Beti Parhao” বুলি কৈ ফুৰিছিল, কিন্তু এতিয়া অসমতেই মহিলাৰ সুৰক্ষা নাই।”