শুক্ৰবাৰে দিচপুৰ খেলপথাৰত লোক কল্যাণ দিৱসৰ কাৰ্যসূচীত কৰ্মচাৰীলৈ কঠোৰ নিৰ্দেশ মুখ্যমন্ত্ৰী হিমন্ত বিশ্ব শৰ্মাৰ।
সচিবালয়ত কাম কৰিলে ডিজিটেল পদ্ধতিৰে কাম কৰিব জানিবই লাগিব বুলি মুখ্যমন্ত্ৰীগৰাকীয়ে মন্তব্য কৰে। কম্পিউটাৰ নজনা কৰ্মচাৰীসকলৰ বাবে পৃথক কোঠাৰ ব্যৱস্থা কৰাও হ’ব বুলিও মুখ্যমন্ত্ৰীগৰাকীয়ে কয়।
ইয়াৰ লগত সংগতি ৰাখি সমাজৰ বিভিন্ন ক্ষেত্ৰত সেৱা আগবঢ়োৱা ১০ জন কৰ্মচাৰীক মুখ্যমন্ত্ৰীয়ে সন্মানিত কৰে লোক সেৱা বঁটাৰে।
লোককল্যাণ দিৱস উপলক্ষ্যে আয়োজন কৰা এক অনুষ্ঠানত মুখ্যমন্ত্ৰীয়ে সচিবালয়ৰ সকলো কাম পেপাৰবিহীন কৰাৰ কথা উল্লেখ কৰি কয় যে ২ অক্টোবৰৰ পৰা অসম সচিবলয়ৰ সকলো কাম ডিজিটেল হ’ব বুলিও উল্লেখ কৰে।
তেওঁ কয় “২ অক্টোবৰৰ পৰা অসমৰ কোনো বিষয়াই যাতে মেনুৱেল ফাইল নলয় । কোনোবাই যদি কিবা কামত অসম সচিবালয়লৈ আহে তেনেহলে সচিবালয়ৰ বাহিৰত কম্পিউটাৰত টাইপ কৰিলেই সকলো নিষ্পত্তি হ’ব।”
ইয়াৰে লগতে সচিবালয়ত কাম কৰা কৰ্মচাৰীসকলক কম্পিউটাৰ শিকিবলৈ আহ্বান জনায় মুখ্যমন্ত্ৰীগৰাকীয়ে।
তেওঁ পুনৰ কয় “কম্পিউটাৰ শিকিব নোখোজা কৰ্মচাৰীক কোনেও কাম নিদিব। তেওঁলোকক আমাৰ মাজত নাই বুলি আমি ধৰি লম।সচিবালয়ত কাম কৰিলে ডিজিটেল পদ্ধতিৰে কাম কৰিব জানিবই লাগিব।”
