অশোক ধানুকা নামৰ ব্যৱসায়ী জনৰ সৈতে অসমৰ মুখ্যমন্ত্ৰীৰ কি সম্পর্ক সেই কথা অসমৰ ৰাইজে জানে। সকলোৰে মনত আছে – অসমত বিজেপি চৰকাৰে এটা শ্ল’গান দিছিলে যে তেওঁলোকে দুর্নীতিমুক্ত অসম গঢ়িব আৰু অপৰাধীমুক্ত অসম গঢ়িব বুলি কৈ বিভিন্ন ঠাইত এনকাউণ্টাৰ সংঘটিত কৰি মানুহ হত্যা কৰিবলৈ লাগি গৈছিল।
কিন্তু এজন অপৰাধী, যাক পশ্চিমবংগৰ চি আই ডিয়ে অপৰাধী বুলি কৈছে সেইজনক অসমৰ মুখ্যমন্ত্ৰীয়ে ৰক্ষণাবেক্ষণ দি ৰাখিছে। অসম আৰক্ষী মোতায়েন কৰি অশোক ধানুকাৰ বাসভৱনত পহৰা দিওৱা হৈছে।
ইয়াৰ বিপৰীতে গুজৰাটৰ বিধায়ক জিগনেশ মেৱানীক সামাজিক মাধ্যমত এটা সাধাৰণ ‘প’ষ্ট’ দিয়াৰ বাবে অপৰাধী সজাই অসম আৰক্ষীয়ে দুহেজাৰ কিল’মিটাৰ বিমানেৰে গুজৰাটলৈ গৈ তেওঁক গ্ৰেপ্তাৰ কৰি আনিছিল। এয়া ভণ্ডামি নহয় যদি কি? বুলি উল্লেখ কৰে ভূপেন বৰাই।
আজি পুৱা লখিমপুৰৰ লালুকত অসম প্ৰদেশ কংগ্ৰেছ কমিটীৰ সভাপতি ভূপেন কুমাৰ বৰাই ‘অশোক ধানুকা কাণ্ড সম্পৰ্কত সাংবাদিকৰ আগত এইদৰে কয় “ঝাৰখণ্ডৰ চৰকাৰ ভঙা পতাত যে অসমৰ মুখ্যমন্ত্ৰী জড়িত সেই কথা কংগ্ৰেছ বিধায়ক অনুপ সিঙে ইতিমধ্যে ঝাৰখণ্ডৰ ৰাঁচী থানাত দিয়া গোচৰৰ তথ্যতে প্ৰকাশ পাইছে।
কলকাতাত তিনিজন বিধায়কৰ গাড়ীৰ পৰা আৰক্ষীয়ে উদ্ধাৰ কৰা লাখে লাখে টকা অসমৰ মুখ্যমন্ত্রী হিমন্ত বিশ্ব শৰ্মাৰ পৰিয়াৰ একান্ত ঘনিষ্ঠ ব্যবসায়ী অশোক ধানুকাই যে যোগান ধৰিছিলে তাৰ সবিশেষ তথ্য পশ্চিমবংগৰ চি আই ডিয়ে লাভ কৰিছে।”
“অশোক ধানুকাৰ বিৰুদ্ধে অপৰাধী বুলি প্ৰমাণ লাভ কৰি তেওঁক ধৰি নিবলৈ অহা, সোধা পোছা কৰিবলৈ অহা পশ্চিমবংগ চি আই ডিৰ দলক অসম আৰক্ষীয়ে ‘নিকিনা গোলাম’ৰ দৰে অশোক ধানুকাক নিৰাপত্তা দিবলৈ চেষ্টা কৰিছিল।
অসম আৰক্ষী অসমৰ মানুহৰ কৰ-কাটলৰ পইচাৰে চলি আছে। তেওঁলোকক কোনেও অসমৰ অপৰাধীক নিৰাপত্তাৰ কামত নিয়োজিত কৰিবলৈ বাধ্য কৰিব নোৱাৰে”তেওঁ লগতে কয়।
“অসম পুলিচে নিজৰ গাত কালিমা সানিব নালাগে।আপোনালোকক অসমৰ ৰাইজে চাই আছে। আপোনালোকৰ স্বাভিমান আৰু আত্মসম্মান অশোক ধানুকাৰ দৰে এজন অসাধু ব্যৱসায়ীৰ দুৰ্নীতি ঢাকিবৰ কাৰণে ব্যৱহাৰ হ’বলৈ নিদিব” বুমি তেওঁ শেষত কয়।
