ৰাহুল গান্ধীৰ বিৰুদ্ধে ‘ক্ষোভ’ উজাৰি কংগ্ৰেছৰ পৰা পদত্যাগ কৰিলে জ্যেষ্ঠ কংগ্ৰেছ নেতা গোলাম নবী আজাদে। তেওঁ কংগ্ৰেছৰ সকলো পদৰ পৰা পদত্যাগ কৰিছে। শুকুৰবাৰে আজাদে ছোনিয়া গান্ধীলৈ লিখা পদত্যাগ পত্ৰত নিজৰ ক্ষোভ উজাৰি দিছে।দল ত্যাগ কৰাৰ পিছত তেওঁ মন্তব্য কৰি কয়, “কংগ্ৰেছে দেশৰ বাবে যি ভাল সেয়া কৰাত ব্যৰ্থ হৈছে।”পাঁচ পৃষ্ঠাৰ পদত্যাগ পত্ৰত গোলাম নবীয়ে আজাদে লিখিছে, “সমগ্ৰ সাংগঠনিক নিৰ্বাচন প্ৰক্ৰিয়াটো এক প্ৰহসন। দেশৰ কোনো ঠাইতে সংগঠনটোৰ কোনো পৰ্যায়ত কোনো নিৰ্বাচন হোৱা নাই।‘’
কংগ্ৰেছৰ প্ৰাক্তন সভাপতি ৰাহুল গান্ধীৰ নাম নোলোৱাকৈ তেওঁক লক্ষ্য কৰি প্ৰবীণ নেতাজনে কয় যে এই সকলোবোৰ ঘটিছে কাৰণ যোৱা আঠ বছৰত নেতৃত্ব দিয়া ব্যক্তিজন “অপৰিপক্ক”।পদত্যাগ পত্ৰত আজাদে প্ৰাক্তন প্ৰধানমন্ত্ৰী ইন্দিৰা গান্ধীৰ সৈতে তেওঁৰ “ঘনিষ্ঠ সম্পৰ্ক”ৰ কথাও উল্লেখ কৰে।গোলাম নবী আজাদে কেইদিনমান আগতে জম্মু আৰু কাশ্মীৰ প্ৰচাৰ সমিতি আৰু ৰাজনৈতিক পৰিক্ৰমা বিভাগৰ পেনেলৰ পৰা পদত্যাগ কৰিছিল।
২০২০ চনৰ আগষ্টত দলৰ নিৰ্বাচন আৰু স্থায়ী সভাপতি নিযুক্তিৰ দাবীত কংগ্ৰেছ অধ্যক্ষ ছোনিয়া গান্ধীলৈ চিঠি লিখা ২৩ জন নেতাৰ ভিতৰত আজাদো আছিল।কিছুদিন পূৰ্বে কংগ্ৰেছৰ ‘ক্ষুব্ধ’ গোটৰ নেতা হিচাপে পৰিচিত আনন্দ শৰ্মাই হিমাচল প্ৰদেশৰ ‘পৰ্যবেক্ষক সমিতি’ৰ মুৰব্বীৰ পদৰ পৰা পদত্যাগ কৰে। হিমাচল প্ৰদেশত নিৰ্বাচন আহি আছে। ইয়াৰ পূৰ্বে আনন্দ শৰ্মাৰ পদত্যাগে কংগ্ৰেছ শিবিৰত অস্থিৰতাৰ সৃষ্টি কৰিছে। জম্মু আৰু কাশ্মীৰৰ প্ৰাক্তন মুখ্যমন্ত্ৰীগৰাকীয়ে কাশ্মীৰৰ ৰাজনীতিত নমাৰ উদ্দেশ্যে এটা নতুন দল আৰম্ভ কৰাৰ সম্ভাৱনা প্ৰকাশ কৰিছে।সংবাদ মাধ্যমৰ সৈতে এক সাক্ষাৎকাৰত আজাদে দিয়া ভাষ্য অনুসৰি তেওঁ এতিয়া জম্মু-কাশ্মীৰৰ ৰাজনীতিত জড়িত হ’ব আৰু ৰাজ্যখনত নিজাকৈ এটা দল গঠন কৰিব।
তাৰ পাছতহে তেওঁ ৰাষ্ট্ৰীয় পৰ্যায়ৰ ৰাজনীতিৰ কথা চিন্তা কৰিব বুলি জেষ্ঠ নেতাগৰাকীয়ে উল্লেখ কৰে।চলিত বছৰৰ শেষৰ ফালেই জম্মু আৰু কাশ্মীৰত নিৰ্বাচন অনুষ্ঠিত হ’ব। আজাদৰ ঘনিষ্ঠ সূত্ৰই ইতিমধ্যে জম্মু আৰু কাশ্মীৰ নিৰ্বাচনৰ পূৰ্বেই নতুন দল গঠনৰ ইঙ্গিত দিছে।উল্লেখ্য যে গুলাম নবী আজাদে কিছুদিন পূৰ্বে জম্মু-কাশ্মীৰ কংগ্ৰেছৰ এটা গুৰুত্বপূৰ্ণ পদ ত্যাগ কৰাৰ পিছতে ক্ষোভ প্ৰকাশ আজি দল ত্যাগ কৰে।পৰৱৰ্তী সময়ত কি কৰিব? এয়া এতিয়া বহুতৰে বাবে এক গুৰুত্বপূৰ্ণ প্ৰশ্ন হৈ উঠিছে। তেওঁৰ ৰাজনৈতিক ভৱিষ্যত কি হ’ব?
প্ৰধানমন্ত্ৰী নৰেন্দ্ৰ মোদীৰ সৈতে আজাদৰ এটা ভাল ব্যক্তিগত সম্পৰ্ক আছে। ৰাজ্যসভাত প্ৰবীণ কংগ্ৰেছ নেতাগৰাকীৰ বিদায় অভ্যৰ্থনাৰ দিনা প্ৰধানমন্ত্ৰীৰ চকুত চকুপানী দেখা গৈছিল। মোদীয়ে এইবুলিও ইংগিত দিছিল যে সুযোগ পালে তেওঁ আজাদক সংসদলৈ ঘূৰাই আনিব। কেন্দ্ৰীয় চৰকাৰে কাশ্মীৰৰ প্ৰাক্তন মুখ্যমন্ত্ৰীগৰাকীক ‘পদ্ম’ বঁটা প্ৰদান কৰিছিল। চৰকাৰে আজাদৰ ক্ষেত্ৰত অভূতপূৰ্ব উদাৰতা দেখুৱাইছে ।
আজাদে ৰাহুল গান্ধী আৰু কংগ্ৰেছক সমালোচনা কৰাৰ পৰা বহুতে তেওঁ কংগ্ৰেছৰ বিপৰীত মেৰুত থকা দলটোত যোগদান কৰিব বুলিও ধাৰণা কৰিছে। শেহতীয়াকৈ কংগ্ৰেছ ত্যাগ কৰি বিজেপিত যোগদান কৰা হাৰিয়ানাৰ নেতা কুলদীপ বিষ্ণোই একেই সম্ভাৱনাৰ কথাই আজি উল্লেখ কৰে। আজাদ কেইদিনমান আগতে কংগ্ৰেছৰ হাৰিয়ানাৰ পৰ্যবেক্ষক আছিল। স্বাভাৱিকতে তেওঁ কুলদীপ বিষ্ণোইৰ সৈতে ঘনিষ্ঠ হৈ পৰিছিল।
আজাদে কংগ্ৰেছ ত্যাগ কৰাৰ পিছতে বিষ্ণোই কয়, “কংগ্ৰেছ এতিয়া আত্মহত্যা কৰাৰ পথত আছে। আজাদ এজন ভাল গণ নেতা। বিজেপিত যোগদানৰ বিষয়ত মই তেওঁৰ সৈতে কথা পাতিব পাৰো আৰু তেওঁক বিজেপিত যোগদান কৰোৱাবলৈ চেষ্টা কৰিব পাৰো।”
