বিশ্বৰ মহাকাশ গৱেষণাৰ ক্ষেত্ৰত আজি এক নতুন যুগৰ সূচনা হোৱাৰ সম্ভাৱনা আছিল যদিও শেষ মুহূৰ্তত সেয়া হৈ নুঠিল। প্ৰায় ৫০ বছৰ আগৰ ডুখৰীয়া ছবিবোৰ আজি আকৌ বিশ্ববাসীৰ সন্মুখত জিলিকি উঠিলহেঁতেন। ৫০ বছৰ পূৰ্বে নাছাই চন্দ্ৰলৈ এপলো যান প্ৰেৰণ কৰি চলাইছিল প্ৰথমটো চন্দ্ৰ অভিযান। নাছাৰ এপলো যুগৰ কথা মানুহে প্ৰায় পাহৰি যোৱাৰ দৰেই হৈছে। এনে সময়তে নাছাই আন এগৰাকী গ্ৰীক দেৱীৰ চন্দ্ৰ অভিযানৰ পৰৱৰ্তী অভিযান আজি আৰম্ভ কৰাৰ কথা আছিল।
গ্ৰীক দেৱীৰ নামৰে নামাংকিত আৰ্টেমিছ ১ যান খন আজি ভাৰতীয় সময় অনুসৰি প্ৰায় ৬ বজাত আমেৰিকা যুক্তৰাষ্ট্ৰৰ ফ্লৰিডাৰ কেনেডি স্পেচ চেণ্টাৰৰ পৰা চন্দ্ৰলৈ প্ৰেৰণ কৰাৰ কথা আছিল নাছাই। কিন্তু যান খনত দেখা দিয়া যান্ত্ৰিক বিজুতিৰ বাবে নাছাই আজি নতুন মহাকাশযান উৎক্ষেপণ স্থগিত ৰখাৰ কথা ঘোষণা কৰে। নাছাৰ সূত্ৰই প্ৰকাশ কৰা মতে আৰ্টেমিছ ১ ক নাছাৰ ‘গভীৰ মহাকাশ অন্বেষণ’ অভিযানৰ অংশ হিচাপে প্ৰেৰণ কৰা হ’ব। চন্দ্ৰৰ দক্ষিণ মেৰু নিৰীক্ষণ কৰাৰ পিছত যান খনে অহা বছৰ পৃথিৱীলৈ ঘূৰি আহিব। মহাকাশ বিজ্ঞানীসকলৰ এই অভিযানকলৈ এতিয়া বিশ্বজুৰি কৌতূহলৰ সৃষ্টি হৈছে।
‘আৰ্টেমিছ ১’ যান খন তিনিটা প্ৰণালীৰ ওপৰত আধাৰিত – ‘অৰিয়ন মহাকাশযান’, ‘মহাকাশ উৎক্ষেপণ প্ৰণালী ৰকেট’ আৰু ‘গ্ৰাউণ্ড চিষ্টেম’। এই অভিযানটো নাছাৰ গভীৰ মহাকাশ অন্বেষণ অভিযানৰ অংশ হিচাবে গ্ৰহণ কৰা হৈছে।
যদি এই অভিযান সফল হয় তেন্তে নাছাই ২০২৪ চনত চন্দ্ৰলৈ মহাকাশচাৰী প্ৰেৰণ কৰিব। ইয়াৰ বাবে মহাকাশচাৰী চন্দ্ৰলৈ যাবলগীয়া যানৰ আৰ্হিও তৈয়াৰ কৰা হৈছে। মহাকাশচাৰীসকলে বিশাল এছএলএছ ৰকেট আৰু অৰিয়ন মহাকাশযানৰ সহায়ত চন্দ্ৰৰ কক্ষপথত উপস্থিত হ’ব। তাৰ পৰা তেওঁলোকে চন্দ্ৰৰ দক্ষিণ গোলাৰ্ধত স্পেচএক্সৰ হিউমেন লেণ্ডাৰ চিষ্টেম (এইচএলএছ)ৰ সহায়ত উপস্থিত হ’বলৈ সক্ষম হ’ব।
চন্দ্ৰ সেই স্থান সদায় বৰফেৰে আৱৰি থকা বুলি ধাৰণা কৰা হৈছে। চন্দ্ৰলৈ পুনৰ মানৱ অভিযানৰ প্ৰস্তুতি হিচাপে আজি নাছাই আৰ্টেমিছ ১ যান খন চন্দ্ৰলৈ প্ৰেৰণ কৰিব বিচাৰিছিল। নাছাৰ লক্ষ্য হৈছে চন্দ্ৰপৃষ্ঠত নতুন প্ৰযুক্তিৰ পৰীক্ষামূলক ব্যৱহাৰ কৰা। এছএলএছ ৰকেট আৰু অৰিয়ন মহাকাশযানৰ প্ৰদৰ্শন চাই এই প্ৰযুক্তিটোৰ গ্ৰহণযোগ্যতাৰ বিষয়টো নিশ্চিত কৰা হ’ব। আৰ্টেমিছ ১ যান খনে পূৰ্বে চন্দ্ৰলৈ প্ৰেৰিত যিকোনো যানতকৈ দীঘলীয়া দূৰত্ব অতিক্ৰম কৰাৰ কথা।
৪২ দিনত যান খনে ৬০ হাজাৰ কিলোমিটাৰ যাত্ৰা কৰিব বুলি নাছাই প্ৰকাশ কৰিছিল। যান খনৰ যান্ত্ৰিক বিজুতি দূৰ কৰাৰ পিছতে যান খন চন্দ্ৰলৈ প্ৰেৰণ কৰা হ’ব বুলি নাছাৰ সূত্ৰই প্ৰকাশ কৰিছে।
