নতুন কেৰিয়াৰ আৰম্ভ কৰাৰ দিশে কিংবদন্তী ব্ৰায়ান লাৰা: প্ৰশিক্ষক হিচাপে নিযুক্তি দিলে ছানৰাইজাৰ্ছ হায়দৰাবাদে

ৱেষ্ট ইণ্ডিজৰ কিংবদন্তী ক্ৰিকেট তাৰকা ব্ৰায়ান লাৰাই খেলুৱৈ হিচাপে অভুতপূৰ্ব সাফল্য অৰ্জন কৰাৰ পিছত এইবাৰ প্ৰশিক্ষক হিচাপে নিজৰ নতুন কেৰিয়াৰ আৰম্ভ কৰাৰ দিশে আগবাঢ়িছে। প্ৰাক্তন ক্ৰিকেটাৰ গৰাকীয়ে বিশ্বৰ ভিতৰতে ধৰ্নাঢ্য ক্ৰিকেট লীগ ইণ্ডিয়ান প্ৰিমিয়াৰ লীগত প্ৰশিক্ষক হিচাপে কেৰিয়াৰ আৰম্ভ কৰিবলৈ সাজু হৈছে।

বিশ্ব ক্ৰিকেটৰ ইতিহাসৰে এগৰাকী অন্যতম শ্ৰেষ্ঠ খেলুৱৈ হিচাপে স্বীকৃত লাৰাক আজি আই পি এল ফ্ৰেঞ্চাইজি ছানৰাইজাৰ্ছ হায়দৰাবাদে নতুন মুখ্য প্ৰশিক্ষক হিচাপে নিযুক্তি দিছে।

ফ্ৰেঞ্চাইজিটোৱে বিগত ছিজনৰ দলটোৰ মুখ্য প্ৰশিক্ষক টম মুডীৰ স্থানত লাৰাক নতুন মুখ্য প্ৰশিক্ষক হিচাপে নিযুক্তি দিয়াৰ কথা আজি নিশ্চিত কৰে।

🚨Announcement 🚨

The cricketing legend Brian Lara will be our head coach for the upcoming #IPL seasons. 🧡#OrangeArmy pic.twitter.com/6dSV3y2XU2

— SunRisers Hyderabad (@SunRisers) September 3, 2022

উল্লেখ্য যে লাৰা বিগত ছিজনত ছানৰাইজাৰ্ছ হায়দৰাবাদৰ সৈতে পৰামৰ্শদাতা আৰু বেটিং প্ৰশিক্ষক হিচাপে জড়িত আছিল। এইবাৰ প্ৰথমবাৰৰ বাবে লাৰাই মুখ্য প্ৰশিক্ষকৰ দায়িত্ব বহন কৰিব।

স্মৰ্তব্য যে ২০১৩ চনৰ পৰা ২০১৯ চনৰ ভিতৰত প্ৰশিক্ষক হিচাপে টম মুডীৰ কাৰ্যকালতে ছানৰাইজাৰ্ছে পাঁচবাৰ প্লে অফত উপনীত হোৱাৰ বিপৰীতে ২০১৬ চনত চেম্পিয়ন হৈছিল।

বিগত ছিজনতো মুডী দলটোৰ প্ৰশিক্ষক হিচাপে আছিল যদিও ছানৰাইজাৰ্ছে ছয়খন মেচত জয় আৰু আঠখনত পৰাজয়েৰে অষ্টম স্থানতে সন্তুষ্ট থাকিবলগীয়া হৈছিল।