শিক্ষাৰ নামত ছাত্ৰ-ছাত্ৰীক শাৰীৰিকভাৱে অকথ্য নিৰ্যাতন চলোৱাৰ ঘটনা বহু সময়ত প্ৰকাশ পায়। পিছে শিক্ষাৰ্থীক বাধ্য কৰোৱাৰ নামত এনে অগ্ৰহণীয় নিৰ্যাতনৰ বাবে বহুসময়ত শিক্ষকসকলো শাস্তিৰ সন্মুখীন হয়। এনে এক ঘটনাই সংঘটিত হৈছে মধ্য প্ৰদেশত।
ৰাজ্যখনৰ গোৱালিয়ৰত এগৰাকী টিউচন শিক্ষকে ছাত্ৰক কৰিবলৈ দিয়া হোমৱৰ্ক সম্পূৰ্ণ নকৰাৰ বাবেই এটি আঠ বছৰীয়া ছাত্ৰক লোহাৰ ৰডেৰে নিৰ্মমভাৱে প্ৰহাৰ কৰে।
এই চাঞ্চল্যকৰ ঘটনা ১ ছেপ্টেম্বৰতে থাইপুৰ অঞ্চলত সংঘটিত হৈছিল যদিও শেহতীয়াকৈ সংবাদ মাধ্যম যোগে পোহৰলৈ আহিছে।
প্ৰকাশিত খবৰ অনুসৰি শিক্ষকগৰাকীয়ে আগদিনা কৰিবলৈ দি পঠোৱা হোমৱৰ্ক ঘটনাৰ দিনা পৰীক্ষা কৰাৰ সময়তে পঞ্চম শ্ৰেণীত অধ্যয়নৰত ছাত্ৰগৰাকীয়ে হোমৱৰ্ক সম্পূৰ্ণ নকৰাৰ কথা জানিব পাৰে।
তাৰ পাছতেই শিক্ষক গৰাকীয়ে এডাল লোহাৰ ৰড উলিয়াই ছাত্ৰগৰাকীক নিৰ্মমভাৱে প্ৰহাৰ কৰে। এই প্ৰহাৰত ছাত্ৰ গৰাকীয়ে ভৰি আৰু পিঠিত গুৰুতৰভাৱে আঘাত পায়।
পিছত ভুক্তভোগী শিশুটিয়ে ঘটনাৰ কথা তেওঁৰ পিতৃ-মাতৃক অৱগত কৰাৰ লগে লগে তেওঁলোকে অভিযুক্ত শিক্ষক গৰাকীৰ বিৰুদ্ধে আৰক্ষীৰ ওচৰত অভিযোগ দাখিল কৰে।
এই অভিযোগৰ পাছতে অভিযুক্ত শিক্ষক গৰাকীৰ বিৰুদ্ধে আৰক্ষীয়ে শিশু আইন আৰু ভাৰতীয় দণ্ডবিধিৰ প্ৰাসংগিক ধাৰাৰ অধীনত এটা গোচৰ ৰুজু কৰি তেওঁক গ্ৰেপ্তাৰ কৰে।
জিলাখনৰ আৰক্ষী অধীক্ষক গৰাকীয়ে জানিবলৈ দিয়া মতে অভিযুক্ত শিক্ষকগৰাকীক যোগেশ শ্ৰীবাস্তৱ বুলি চিনাক্ত কৰা হৈছে।
ইতিমধ্যে ঘটনা সন্দৰ্ভত তদন্ত আৰম্ভ কৰা হৈছে আৰু তদন্তৰ পিছত অভিযুক্ত শ্ৰীবাস্তৱৰ বিৰুদ্ধে আইনী পদক্ষেপ গ্ৰহণ কৰা হ’ব আৰক্ষী অধীক্ষক গৰাকীয়ে লগতে জানিবলৈ দিয়ে।
