উচ্চতম ন্যায়ালয়ে শিক্ষানুষ্ঠানসমূহত হিজাব পিন্ধাৰ অধিকাৰ সম্পৰ্কীয় এটা গোচৰত নিজৰ ৰায় সংৰক্ষিত ৰাখিছে। ন্যায়াধীশ হেমন্ত গুপ্তা আৰু সুধাংশু ধুলিয়াৰ বিচাৰপীঠে বৃহস্পতিবাৰে কৰ্ণাটক উচ্চ ন্যায়ালয়ৰ ৰায়ক প্ৰত্যাহ্বান জনোৱা এখন আবেদনৰ ১০ দিনৰ শুনানিৰ পিছত এই সিদ্ধান্ত ঘোষণা কৰে।
হিজাব পিন্ধাৰ অধিকাৰ বিচৰা ছাত্ৰীসকলৰ পিছত পপুলাৰ ফ্ৰন্ট অফ ইণ্ডিয়া (পিএফআই) সংগঠনৰ ভূমিকা থকা বুলি কৰ্ণাটক চৰকাৰৰ অভিযোগ সন্দৰ্ভতো বুধবাৰে শীৰ্ষ ন্যায়ালয়ত দুই ন্যায়াধীশৰ বিচাৰপীঠে কোনো পৰ্যৱেক্ষণ কৰা নাছিল।
শীৰ্ষ আদালতত ১০ দিনীয়া শুনানিৰ সময়ত কৰ্ণাটক চৰকাৰক ছলিচিটৰ জেনেৰেল তুষাৰ মেহতা, অতিৰিক্ত ছলিচিটৰ জেনেৰেল কে এম নটৰাজ আৰু ৰাজ্যখনৰ এডভোকেট জেনেৰেল প্ৰভুলিং কে নৱদগীয়ে প্ৰতিনিধিত্ব কৰে।
আনহাতে, চলমান খুৰ্ছিদ আৰু দুষ্মন্ত ডাভে আবেদনকাৰী মুছলমান শিক্ষাৰ্থীসকলৰ হৈ শুনানিত অংশগ্ৰহণ কৰে।
জানুৱাৰী মাহত, হিজাব পৰিহিত শিক্ষাৰ্থীৰ এটা গোটক কৰ্ণাটকৰ উদুপীৰ এখন মহাবিদ্যালয়ত শ্ৰেণীত বহিবলৈ বাধা দিয়া হৈছিল। মহাবিদ্যালয় উন্নয়ন সংস্থাৰ সভাপতি, বিজেপি বিধায়ক ৰঘুপতি ভট্টই স্পষ্ট কৰি দিছিল যে হিজাব পিন্ধা সকলক শ্ৰেণীত প্ৰৱেশ কৰিবলৈ অনুমতি দিয়া নহ’ব।
বিতৰ্কটো ক্ষিপ্ৰগতিত ৰাজ্যজুৰি বিয়পি পৰিছিল। হিজাবৰ প্ৰতিবাদ হিচাপে কেইবাটাও হিন্দুত্ববাদী সংগঠনে গেৰুৱা উত্তৰীয় পৰিধান কৰি এটা আন্দোলন আৰম্ভ কৰিছিল। কিছুমান ঠাইত হিজাব পন্থী আৰু হিজাব বিৰোধী প্ৰতিবাদকাৰীসকল মুখামুখি হৈছিল। আৰক্ষীৰ সৈতেও কেইবাটাও সংঘৰ্ষ হৈছিল।
লগতে পঢ়ক: ভাৰতৰ লগতে ম্যানমাৰতো পৰে নাগালেণ্ডৰ এইখন গাওঁ; ইয়াৰ ৰজাৰ আছে ৬০ গৰাকী পত্নী
ফেব্ৰুৱাৰীত কৰ্ণাটকৰ বিজেপি চৰকাৰে হিজাবক লৈ হোৱা বিতৰ্কৰ পৰিপ্ৰেক্ষিতত ইউনিফৰ্মৰ নিৰ্দেশনা জাৰী কৰিছিল। কৰ্ণাটক শিক্ষা আইন, ১৯৮৩ ৰ কথা উল্লেখ কৰি নিৰ্দেশনাৱলীত কোৱা হৈছিল যে শিক্ষাৰ্থীসকলে কৰ্তৃপক্ষই নিৰ্ধাৰিত কৰি দিয়া পোছাক পিন্ধি শিক্ষানুষ্ঠানলৈ আহিব লাগিব। অৱশ্যে যিবোৰ মহাবিদ্যালয়ত কোনো পোছাক বিধি নাই তাত তেনে কাপোৰ পিন্ধিব নোৱাৰিব য’ত শিক্ষানুষ্ঠান চৌহদৰ ভাৰসাম্য, ঐক্য আৰু অনুশাসন বিঘ্নিত হয়। কৰ্ণাটক চৰকাৰে আদালতক কৈছিল যে আদেশটোৰ সাম্প্ৰদায়িকতাৰ সৈতে কোনো সম্পৰ্ক নাই। হিজাবৰ লগতে গেৰুৱা উত্তৰীয়কো নিষিদ্ধ কৰা হৈছে।
উদুপীৰ কেইগৰাকীমান মুছলমান ছাত্ৰীয়ে কৰ্ণাটকত বিজেপি চৰকাৰৰ সিদ্ধান্তৰ বিৰুদ্ধে কৰ্ণাটক উচ্চ ন্যায়ালয়ত এখন ৰিট আবেদন দাখিল কৰিছিল। তেওঁলোকে আদালতক কৈছিল যে হিজাব পিন্ধাটো তেওঁলোকৰ মৌলিক অধিকাৰ। কোনো প্ৰকাৰে ইয়াক বাতিল কৰিব নোৱাৰি।
লগতে পঢ়ক: সৰ্বোপৰি দেশ! ৰাছিয়াৰ সাংসদসকলেও যোগ দিব লাগিব ইউক্ৰেইনৰ যুদ্ধত!
অৱশ্যে ১৫ মাৰ্চত কৰ্ণাটক উচ্চ ন্যায়ালয়ে এই আবেদন খাৰিজ কৰে আৰু চৰকাৰৰ আদেশ বাহাল ৰাখে। ৰায়টোত কোৱা হয় যে হিজাব পিন্ধাটো ধৰ্মীয় অনুশীলনৰ এক অপৰিহাৰ্য অংশ হিচাপে দেখা উচিত নহয়। তাৰপিছতে কেইগৰাকীমান মুছলমান ছাত্ৰীয়ে ৰায়টোৰ বিৰুদ্ধে উচ্চতম ন্যায়ালয়ত আবেদন কৰে।