জনসাধাৰণৰ নিৰাপত্তা আৰু আইন-শৃংখলা ৰক্ষাৰ দায়িত্বত থকা আৰক্ষী কৰ্মীয়েই বহুসময়ত নিজেই অপৰাধমূলক কাম-কাজত জড়িত হৈ গ্ৰেপ্তাৰৰ সন্মুখীন হোৱা দেখিবলৈ পোৱা গৈছে। সেইদৰে সমাজৰ হিতৰ কাৰণে আগবাঢ়ি অহা একাংশ লোকৰ এই প্ৰত্যাশাৰ আঁৰত থকা কু-কৰ্মৰ ঘটনাও বহু সময়ত পোহৰলৈ আহিছে।
এনে এক ঘটনাৰ বাবেই শেহতীয়াকৈ ৰঙাঘৰৰ আলহী হ’বলগীয়া হৈছে দুগৰাকী আৰক্ষী কৰ্মী, এগৰাকী সমাজ সচেতক নামধাৰী ব্যক্তিসহ চাৰি দুৰ্বৃত্ত। দুগৰাকী যুৱকৰ পৰা ৩০ লাখতকৈও অধিক টকা লুণ্ঠন কৰাৰ অভিযোগত বৃহস্পতিবাৰে কলকাতাৰ একবালপুৰ অঞ্চলৰ পৰা এই চাৰিগৰাকী লোকক গ্ৰেপ্তাৰ কৰিছে আৰক্ষীয়ে।
ঘটনা সন্দৰ্ভত গোচৰটোৰ তদন্তৰ দায়িত্বত থকা আৰক্ষী বিষয়াগৰাকীয়ে জানিবলৈ দিয়া মতে, দুই যুৱক বুধবাৰে তেওঁলোকৰ কৰ্মৰত কোম্পানীৰ কাৰ্যালয়ৰ পৰা বেংকলৈ ধন লৈ যোৱাৰ সময়ত চাৰিজনীয়া দলটোৱে লুণ্ঠন কৰা বুলি অভিযোগ দাখিল কৰিছিল।
যুৱক দুগৰাকীৰ অভিযোগ মতে তেওঁলোক বেংকলৈ গৈ থকাৰ সময়তে নিজকে আৰক্ষী বুলি চিনাকি দিয়া দুগৰাকী ব্যক্তিয়ে তেওঁলোকক বাট আগচি ধৰিছিল। দুই আৰক্ষী কৰ্মীয়ে যুৱক দুগৰাকীৰক ওচৰৰ এখন হোটেললৈ লৈ যায় আৰু তাতে সমাজ সচেতক হিচাপে পৰিচিত ব্যক্তিগৰাকী আৰু আন এগৰাকী লোকৰ সৈতে মিলি তেওঁলোকক শাৰীৰিক আক্ৰমণ কৰে।
চাৰিও অভিযুক্তই প্ৰহাৰ কৰাৰ পাছতে তেওঁলোকে লগত লৈ যোৱা সমুদায় ধনৰাশিও কাঢ়ি নিয়ে বুলি দুই যুৱকে অভিযোগ কৰে। ঘটনাৰ পিছতে যুৱক দুগৰাকীয়ে তেওঁলোক কৰ্মৰত কোম্পানীৰ মেনেজাৰক ফোন যোগে এই বিষয়ে অৱগত কৰে।
ফোন কলৰ জৰিয়তে ঘটনাৰ বিষয়ে খবৰ লাভ কৰাৰ পিছতে মেনেজাৰগৰাকী লগে লগে আৰক্ষী থানাত উপস্থিত হৈ অভিযোগ দাখিল কৰে আৰু তেতিয়াই এই চাঞ্চল্যকৰ ঘটনাৰ কথা পোহৰলৈ আহে। এই অভিযোগৰ পাছতে আৰক্ষীয়ে থানাৰ পৰাই আৰক্ষী কৰ্মী দুগৰাকী আৰু সমাজ সচেতক ব্যক্তিগৰাকীক গ্ৰেপ্তাৰ কৰে।
আনহাতে অভিযুক্ত আনগৰাকী ব্যক্তিকো আৰক্ষীয়ে কিছুসময় পিছতে গ্ৰেপ্তাৰ কৰি থানালৈ নিয়ে। তদন্তকাৰী আৰক্ষী বিষয়াগৰাকীয়ে এই চাঞ্চল্যকৰ ঘটনা সন্দৰ্ভত তদন্ত চলাই থকা হৈছে বুলি উল্লেখ কৰি অপৰাধীসকলৰ বিৰুদ্ধে প্ৰয়োজনীয় ব্যৱস্থা গ্ৰহণ কৰা হ’ব বুলি মন্তব্য কৰিছে।
